Banat ( Leaderboard Top ), pagematch: 1, sectionmatch: 1

Dakong mga tindahan diriyot sirad-i sa BIR

CEBU, Philippines - Wala madayon ang pagpasira sa Bureau of Internal Revenue (BIR)-7 sa lima ka mga branches sa Unitop dinhi sa Metro Cebu ug Tagbilaran City sa Bohol human mipahibawo ang tagdumala niini kagahapon sa ulohang buhatan sa BIR nga mobayad sila og P50 milyones isip pasiunang bayad sa ilang utang sa buhis nga P97 milyones.

Kagahapon sa buntag ang mga kadagkuan sa BIR mipatawag og media briefing aron bahinon ang mga sakop sa media sa pagkuyog sa mga team sa BIR nga maoy mosira sa lima ka branches sa Unitop kagahapon isip kabahin sa Oplan Kandado nga tumong mao ang pagsira sa mga tindahang wala mamayad og saktong buhis sa gobiyerno.

Nangayo usab sila og mga pulis isip back-up sa mga team leader sa BIR pagkandado sa maong mga establisamento. Ang mga branches sa Unitop nga kandadohan unta kagahapon sa buntag nahimutang diha sa dakbayan sa Lapulapu, barangay Maguikay dakbayan sa Mandaue, D. Jakosalem, Tabunok, Talisay ug Tagbilaran City, Bohol.

Si direktor Rodita Galanto sa BIR-7 nagkanayon sa mga tigbalita nga gipadad-an nila og notisya sa nangaging mga adlaw ang tagdumala sa Unitop nga pabayran ang ilang buhis apan wala molihok ang maong tindahan hangtud nga gihimong ultimatum ang kamandoan nga sulod sa 48-oras gikan niadtong Biyernes sa buntag pabayran gyud kini.

Matud ni Galanto napakyas ang tagdumala sa Unitop pagkuha sa mga requirements ug nakalapas usab sila niining mosunod, failure to register, failure to issue receipt, failure to file back return ug under declaration of sales by 30%. Dugang pa sa BIR nga bisan usa lang niining kalapasan sa Unitop mahimo na silang pasirad-an.

Gipasabot sa BIR nga wala magtakdo ang report sa Unitop sa ilang gikita sa miaging tuig ug sa ilang gihimong pakisusi. Matud pa moabot sa 30 porsiyento ang wala madeklarar nga kinitaan sa miaging tuig sa maong tindahan.

Apan samtang nagpadayon ang media briefing kagahapon sa buntag si Galanto nakadawat og tawag sa iyang cellphone gikan sa ilang labaw sa BIR sa Manila nga dili ihinayon ang pagtak-op sa mga branches sa Unitop tungod kay misaad nga mobayad ang maong tindahan og pasiunang P50 milyones sa P97 milyones nga bayronon niini sa   miaging tuig. (BANATNEWS)  

  • Follow Us: