Gipasanginlang miapil og dunggab gipusil kritikal

CEBU, Philippines - Kritikal ang kahimtang sa 21-anyos nga ulitawo human pusila sa amahan sa giingong ilang gitabangan og dunggab nga batan-on didto sa bukirang bahin sa barangay Bae sa lungsod sa Sibonga niadtong Huwebes sa gabii.

Ang napusilan mao si Erem Blanco, molupyo sa barangay Can-aga Sibonga, samtang ang suspetsado sa pagpamusil mao si Domingo Taño, 46, usa ka mag-uuma ug molupyo sa nahisgutang dapit.

Matud ni PO2 Arnold Frenal sa Sibonga Police Station dihang nahinabi sa Banat News nga ang biktima nipauli sa ilang pinuy-anan ug nag-ilis sa senina pagkahuman og ilis mobalik unta kini sa diskohan.

Giingong giatangan sa suspetsado si Blanco diha sa dalan ug gipusil samtang ang biktima naglakaw unta kini paingon ngadto sa diskohan.

Naigo sa lawas ug tapsing sa luyong bahin sa liog ang biktima apan nakahigayon pa kini og dagan bisan og samaron paingon sa balay sa iyang ig-agaw nga si Iboy Estomago diin distansya lang og pipila ka metros.

Daling gihatud ngadto sa Carcar District Hospital ang biktima ug padayon pang giatiman sa mga doktor.

Samtang ang suspetsado nadakpan   sa mga sakop sa Regional Safety Batallion nga nitabang sa gihimong hot pursuit operation ug nagtingkagol karon sa karsel ug nagpaabot sa tukmang sumbong nga ipasaka batok niya.

Sa pagsukit-sukit sa kapolisan ang suspetsado mipasangil sa biktima nga kauban sa grupo sa mga batan-on nga nidunggab sa iyang anak pipila ka bulan na ang nilabay.

Ug giingong panimawos ang gihimo sa suspetsado ngadto sa biktima. (BANATNEWS)