Banat ( Leaderboard Top ), pagematch: 1, sectionmatch: 1

Kabanay ra ni Santos maoy mosumbong - TF Pique

CEBU, Philippines - Posibleng nagparetoke sa iyang nawong si Bella Ruby Santos. Si Santos ang usa sa gipasanginlang suspetsado sa pagdagit ug pagpatay kang Ellah Joy Pique.

Si Sr. Supt. Patrocinio Comendador, hepe sa kapulisan sa probinsya sa Sugbu ug tigpamaba sa Task Force Ellah Joy Pique miingon nga posibleng dunay kausaban sa iyang dagway si Santos kay usa man siya ka gukdonon ug gipangita sa balaod.

Sumala pang Comendador posibleng ang unang usbon ni Santos mao ang iyang buhok nga sagad maoy unahong buhaton sa mga pinangita sa balaod.

Niadtong miaging semana dunay mitumaw nga report nga si Santos tua sa usa sa mga probinsya dinhi sa Visayas ug nagplanong magparetoke sa iyang nawong aron dili mailhan sa mga awtoridad aron makasibat paingon sa laing nasud.

Si Comendador mitataw nga sa pagkakarun daghan gihapon silang nadawat nga mga impormasyon kabahin kang Santos.

Usa sa iyang nadawat mao ang giingong panagbikil sa mga kabanay ni Santos human wala maabot ang kwartang gipadala ni Ian Charles Griffiths nga hinigugma ni Santos nga usa usab sa suspetsado sa pagdagit ug pagpatay sa 6-anyos nga batang si Pique.

Matud pa ni Comendador nga niining panagbangi sa mga kabanay ni Santos makabentaha ang polis ug may posibilidad nga sa umaabot nga mga adlaw adunay motug-an hain magtago-tago si Santos .

Giangkon hinuon ni Comendador nga sa pagkakaron ilang namatikdang wala gyuy intensyon ang kampo ni Santos sa pagpatahan kaniya.

Kini taliwala sa gipasiatab nila nga motahan kini kung gikinahanglan dihang wala pay migawas nga warrant of arrest batok nilang duha apan karon wala na kini mopakita pa.

Matud ni Comendador nagkaanam na og kahanap ang giluwatan nga saad sa kampo ni Santos nga moatubang sa maong kaso.(EIM) (BANATNEWS)

  • Follow Us: