Larsian himuong tourist spot

CEBU, Philippines - Himoong   usa ka tourist attraction sa kagamhanan sa lalawigan sa Sugbo ang nabantog ug naila na kaayong Larsian Bar-B-Q nga nahimutang sa may Fuente Osmeña ning syudad sa Sugbo.

Kini human masayri ni Governor Gwendolyn Garcia nga ubay-ubay sa nga lokal ug langyaw nga turista   nga mohapit gyud sa Larsian sa Fuente aron motilaw sa lamiang pagkaon sa maong lugar.

Si Maricel Amores , ang PR Director of Rotary Club Fuente Osmeña, Cebu maoy mitug-an ngadto sa gobernadora labot sa ilang nasaksihan   sa lote sa probinsiya   nga nahimutangan sa   Larsian.

Matud pa ni Amores nga   ang gobernador naglaraw nga ang kagamhanan sa lalawigan sa Sugbo uban sa ilang grupo maoy mopalambo sa Larsian aron hingpit kining mahimong tourist attraction.

Matud pa ni Amores nga gawas sa pagpatahom ug paglimpyo sa estraktura sa Larsian nga gastohan sa Kapitolyo, bag-ohon na usab ang dagway niini pinaagi sa pagpanaod og eco-friendly solar bottle bulb nga ginama sa My Shelter Foundation nga maoy makahatag og dugang attraction sa mga turista ug sa publiko.

Gipadayag usab ni Amores nga kun mahuman kining maong proyekto sa gobernador, ang Larsian mahimo na unya nga usa sa mga landmark sa Sugbo nga dili sipyaton sa pagbisita sa mga lokal ug langyaw nga mga turista   nga mosuroy dinhi sa dakbayan.  - BANAT NEWS