Estudyanteng gipusil miyembro sa gang

CEBU, Philippines - Gituohan nga “frat war” o away sa magkaribal nga   grupo sa fraternity ang hinungdan   nga napusilan ang usa ka tinun-an sa gawas sa tunghaan sa barangay Cabancalan ,dakbayan sa Mandaue sa milabay’ng hapon.

Ang biktima mao si Junreal Rosal, 26, ulitawo ug residente sa Sitio Pilit Brgy. Cabancalan, dakbayan sa Mandaue usa ka tinun-an sa high school.

Samtang ang mga suspetsado mao sila si Marlon Bunjoc, 16, residente sa Barangay Casuntingan ug classmate sa biktima ug ang kauban niini nga si Rejin Rosasenias, 20, ulitawo ug nagpuyo sa Sitio Galaxy Barangay Maguikay sa maong dakbayan.

Sa pasiunang imbestigasyon sa kapolisan sa Station 4 sa MCPO nasuta nga mga alas 4:10 sa milabay’ng hapon atol sa pagpanggawas sa mga tinun-an duha ka mga sipang buto ang milanog sa maong dapit ug nasuta nga si Rosal gipusil sa duha ka mga tawo.

Gumikan sa samad pinusilan sa dughan gidali kini paghatod ngadto sa Vicente Sotto Memorial Medical Center (VSMMC) ug kasamtangan kining giobserbahan sa mga mananambal.

Samtang mosuway unta sa pagsibat si Bunjoc apan nasikop kini sa mga residente sa maong dapit ug gitugyan ngadto sa kapolisan.

Samtang si Rosasenias   maoy nakaipsot ug wala hidakpi sa mga otoridad.

Pipila ka mga residente sa maong dapit ug mga tinun-an mipadayag nga mga sakop sa managribal nga fraternity ang biktima ug ang mga suspetsado hinungdan nga nagduda ang kapolisan nga adunay relasyon sa frat war ang maong insidente. Si Bunjoc ug Rosasenia pasakaan og kasong frustrated murder sa kapolisan sa Station 4 bisan pa kun nagtagotago si Rosasenia sa pagkakaron. (BANAT NEWS)