Banat ( Leaderboard Top ), pagematch: 1, sectionmatch: 1

Agalon, helper gipatay

CEBU, Philippines - Patay na nga napalgan kagahapon sa buntag diha sulod sa iyang balay sa barangay Kalubihan, lungsod sa Sogod ang 84-anyos nga negosyante ug ang iyang 15-anyos nga katabang.

Ang biktima mao si Felipe Retiza ug ang iyang katabang nga si Elsie Moneba parehong mga residente sa maong dapit kinsa pareho usab nga nakaangkon og samad pinusilan sa ilang ulo.

Si PO2 Lope Arcellas, duty desk officer sa Sogod Police Station nga nahinabi sa Banat News kagahapon nagkanayon nga si Marvin Apor, silingan sa mga biktima nakadungog og duha ka buto sa pusil niadtong Huwebes sa mga alas 11:30 sa gabii apan wala nila kini panumbalinga.

Kagahapon sa mga alas 8:00 sa buntag ang drayber ni Retiza nga si Manuel Bantacel Jr., miabot apan nahibulong kini tungod kay abli ang atubangang balay sa biktima apan sirado ang gate. Hinungdan nga mikatkat siya sa koral aron makasulod sa balay apan mao na lay nasugat sa iyang panan-aw si Retiza nga naggakos sa sofa diha sa sala nga naligo na sa kaugalingong dugo.

Samtang wala na say kinabuhi ang katabang niini nga naglurag diha sa folding bed nga naligo na usab sa kaugalingong dugo hinungdan nga dali siyang mipahibalo sa mga silingan ug mitawag sa kapolisan.

Si Arcellas nagkanayon nga si Retiza mamalitay og mga lote ug iyaha usab kini nga ibaligya.

Walay nawagtang nga mga butang diha sa sulod sa balay matud ni Arcellas.

Si Inspector Aldrin Villacampa, hepe sa Sogod Police Station uban nila ni SPO2 Gualberto Arnado ug SPO1 Jumamel Presillas ang mitubag sa alarma ug nagpahigayon sa imbestigasyon.

Si Arcellas midugang nga padayon pa ang ilang follow-up nga imbestigasyon sa hitabo aron mailhan ang kriminal ug motibo niini. (EIM)   - (BANAT NEWS)

  • Follow Us: