SK Chairman midasmag sa Ceres angol

CEBU, Philippines - Naangol ang Sanguniang Kabataan (SK) Chairman human dasmagi ang gimaneho niining motorsiklo sa gisundan niining Ceres bus didto sa barangay Bagacay lungsod sa Sibonga niadtong Huwebes sa miaging gabii.

Ang biktima mao si Jade Casayas, 16 , ulitawo, ug SK chairman sa barangay Libo,Sibonga, samtang ang drayber sa Ceres bus nga may Body Number 8947 mao si Emirito Erajo, 32 , minyo, nga taga lungsod sa Alcantara.

Si PO3 Ederlino Bacusmo sa Sibonga Police station mibutyag sa Banat News nga ang motorsiklo nga gisakyan sa SK chairman nagsunod sa Ceres bus paingon sa habagatang bahin sa lalawigan.

Apan tungod kay may pasaherong mipara, kalit nga mihunong sa iyang lugar ang bus.

Apan ang biktima nga wala makabantay, wala dayon maka-preno ug dihang mi-preno kini wala usab dayon mosakat, tungod sa kadangog sa karsada gumikan sa padayong ulan.

Busa nalamba sa karsada ang motor ug ang nagsakay niini naugbok sa sementadong karsada busa dali nga gihatod sa mga estambay ngadto sa Deiparine Medical Clinic apan gibalhin kini dayon ngadto sa Vicente Sotto Memorial Medical Center sa dakbayan sa Sugbo.

Ang Ceres bus nga wala maunsa wala nalang usab moreklamo ang drayber kay wala may kadaot nga nahiagoman ang iyang sakyanan ug mipadayon kini sa iyang biyahe. WC (BANAT NEWS)