Ugangan gipatay sa umagad, suspek gipatay pud sa bayaw

CEBU, Philippines - Gipukaw og duslak sa kutsilyo ang usa ka shell craft owner human kini gi-unay og dunggab sa iyang umagad apan ang suspek namatay usab human gidunggab sa iyang bayaw pasado alas-6 sa buntag kagahapon sa sitio Pakpakan barangay Basak syudad sa Lapulapu.

Ang biktima nailhan nga si Edgardo Sabroso, 40, shell craft owner kinsa nakaangkon og samad dinunggaban sa nagkadaiyang parte sa iyang lawas human dunggaba usab sa iyang umagad nga si Jerry Melecio, 26, lumad nga taga Leyte.

Si Melecio napatay usab sa anak ni Sabroso nga si Melchor kinsa daling mibangon gikan sa pagkatulog ug mitabang unta sa amahan ug napatay ang suspek.

Sa imbestigasyon sa Homicide Section, nasayran nga sa wala pa mahitabo ang duguong kabuntagon kagahapon misulong si Melecio sa balay sa ugangan nga si Sabroso.

Apan ang ugangang babaye nga si Melinda maoy miatubang ni Melecio ug gipasabot nga natulog pa si Sabroso, imbes molakaw si Melecio milahos na hinuon kini og sulod sa panimalay dala ang kutsilyo ug gisulod sa lawak si Sabroso dayong duslak-duslak niini.

Si Melinda pagkakita sa gibuhat sa iyang umagad daling misiyagit ug nagpatabang hinungdan nga nakamata ang ilang anak nga si Melchor kinsa daling miresponde ug dihang iyang gipugngan ang suspek giapil na hinuon siya niini og dunggab maong nakig-ilog kini sa kutsilyo ug sa tantong layog nadunggaban makadaghang higayon ang bayaw.

Ang duruha dali nga gidala sa Mactan Doctors Hospital apan pulos gideklarar kini nga dead on arrival.

Si Melchor boluntaryong mitahan sa iyang kaugalingon sa kapolisan ug kasamtangan pa kini nga nagtingkagol sa karsel sa Lapulapu Police Office.

Nakuha sa kapolisan ang kutsilyong gigamit sa pagpanunggab nga nakapatay sa duha nga adunay gitas-ong 11- pulgadas.

Matud pa ni PO1 Junard Cinco, Homicide Section sa Lapulapu City Police Office (LCPO) nga dili na maayo ang relasyon sa duha.

    “Naa nagtrabaho si Melecio sa shell craft anang Edgardo (Sabroso) unya nakasab-an tungod kay wala magtinarong,” pasabot pa ni Cinco.

Ang kapolisan sa syudad sa Lapulapu nagpaabot nalang sa pamilya sa biktima kun pasakaan ba og kaso si Melchor. (BANAT NEWS)