Amo ug helper giluba sa laing helper

CEBU, Philippines - Pulos talandugon ang kahimtang sa negosyante og lechong manok ug ang helper niini human sila unaya og dunggab sa ilang katabang nga menor de edad, nga gidudahang adis -adis didto sa barangay Poblacion lungsod sa Argao sa miaging gabii.

Ang mga biktima mao sila si Edgardo Rodriquez Carin, 46, minyo, nga taga barangay Casay, lungsod sa Dalaguete, negosyante og lechon-manok sa lungsod sa Argao ug ang iyang helper nga si Jonrel Cegle, 21 , lumad nga taga lungsod sa Balamban, apan stay- in   sa balay ni Carin.

Si PO1 Bernard Banugon sa Argao Police mibutyag sa Banat News nga ang suspek kalit lang nanunggab sa iyang amo nga si Carin, ug dihang misuway og badlong si Cegle, gihandusan usab kini sa iyang kutsilyo ug busa samdan kini sa iyang tuong ilok, sama kang Carin nga naigo gihapon sa tuong ilok.

Human sa maong pagpanunggab, migawas ang suspek ug nagpaninggit sa pagpahibawo sa katawhan nga nakadunggab siya samtang nagbitbit sa iyang kutsilyo ug nanghagis sa ilang lugar.

Hinuon wala na makadunggab og laing tawo kay dali kining nasikop sa mga barangay tanod kinsa maoy mitunol niini ngadto sa kapolisan aron mabalhug sa prisohan.

Samtang ang mga biktima gihatod dayon ngadto sa Isidro Kintanar Memorial Hospital sa maong lungsod apan gibalhin usab kini ngadto sa South General Hospital sa lungsod sa Naga. Gituohan sa kapolisan nga tigamitan og gidiling drugas ang suspek. (BANAT NEWS)