Banat ( Leaderboard Top ), pagematch: 1, sectionmatch: 1

Lokal nga karne positibo sa bacteria

CEBU, Philippines - Positibo sa bacteria o kagaw nga makadaot sa lawas sa tawo ang mga local nga karne nga gipamaligya sa kamerkadohan sa mga dakbayan sa Sugbo ug Mandaue sa dihang gi-eksamin kini sa usa ka laboratory technologist.

Ang technologist nga nagpaila lang sa ngalang Jen (di tinuod niyang ngalan) mipamatuod nga sa iyang pag-eksamin sa pinalit niyang karne sa merkado sa dakbayan sa Sugbo ug Mandaue sa miaging adlaw, nakita niya nga ang maong mga karneng baboy nga iyang gi-eksamin sa ilang laboratoryo positibo sa e.coli bacteria, matang sa kagaw nga peligrong mohatag og sakit sa lawas sa tawong makakaon niini.

Matud pa ni Jen nga ang gihimo nilang pag-eksamin sa maong mga local nga karne sulod sa upat ka oras, maoy pagtuman sa hangyo sa pipila ka mga meat importer kinsa napungot na sa mga pagdaot nga gihimo sa mga local nga negosyante og karne sa ilang mga baligyang frozen meat kay delikado kuno kini sa lawas sa tawong makakaon.

Aron sa pagsukod kun luwas ba gyud tinuod ang mga local nga karne, gilusad nila ang lakang sa pagpaeksamin sa mga karneng gikan ra dinhi sa lalawigan nga giladlad sa usa ka tindahan sa merkado sa dakbayan sa Sugbo ug usa usab sa dakbayan sa Mandaue   ug didto namatud-an nila nga utro usab diay ang karne nga gikan ra sa mga kahayopan dinhi sa lalawigan ug uban pang bahin sa nasud nga mao diay ang labing peligro gumikan sa mitapot niining e.coli bacteria.

Gani miawhag siya sa kagamhanan nga kun mahimo mas maayong mosuway kini og testing sa mga karne sa uban pang mga tindahan sa Sugbo ug Mandaue o uban pang kamerkadohan aron masuta kun may karne bang local nga luwas kaunon sa taw o kay ang karne nga iyang gi-eksamin gikan ra sa tagsa ka tindahan sa dakbayan sa Sugbo ug Mandaue.

Gumikan sa pamahayag ni Jen, si Mario Montes usa ka retailer og frozen meat mibutyag nga base sa resulta sa maong laboratory test sa mga local nga karne, nagpasabot lang nga mas safety o luwas ang mga imported meat o frozen meat nga baligya kay sa mga karne nga gikan ra dinhi sa lalawigan.

Matud pa ni Montes nga angayang ipunting na karon sa mga local nga meat inspector ang ilang panan-aw sa mga local nga karne aron masiguro nga luwas kini sa publiko nga mokaon niini.

Kay bahin ni Jen, ang usa ka technologist nga mi-eksamin sa mga karne nga gikan sa merkado sa dakbayan sa Sugbo ug Mandaue nga ang karne nga iladlad sa lamesa sulod sa upat ka oras, kuninitan na kini sa mga kagaw.

Mipasidaan si Jen sa publiko nga aron masiguro nga luwas kaunon ang karne nga paliton kinahanglang kadto lang bag-ong inihaw maoy paliton. - BANAT NEWS

  • Follow Us: