Driver gipatay sa silingan
CEBU, Philippines - Patay ang usa ka drayber sa traysikad human kini pusila samtang namasahero didto sa national highway sa barangay Looc siyudad sa Danao niadtong Lunes sa alas 7:50 sa gabii.
Ang biktima mao si Jeffrey Eugenio, 18 , ulitawo apan dunay kapuyo, ug drayber sa traysikad kinsa lumad nga taga Cagayan De Oro City apan kasamtangang nagpuyo sa maong lugar.
Samtang ang suspek mao si Jonas Geralde Nunez, hingkod, ug silingan sa biktima.
Si SPO4 Edgar Gomez sa Danao City Police Station mibutyag sa Banat News nga mao pay paggawas sa biktima gikan sa ilang balay aron mamasahero.
Apan samtang nagpadagan sa iyang traysikad kalit lang gipusil sa suspek ug pagka-igo sa liog niini, diretsong natagak gikan sa iyang traysikad.
Nakadangat pa sa tambalanan ang biktima apan gideklarar sa mga doctor nga dead on arrival.
Samtang ang suspek nadakpan dayon sa mga polis ug nagtingkagol na karon sa karsel. - BANAT NEWS
- Latest
- Trending