Deadline sa registration sa Sinulog

CEBU, Philippines - Karun nang Miyerkules kon ugmang adlawa sa alas 6:00 sa hapon ang deadline sa registration alang niadtong mga contingent nga buot mosalmot sa Sinulog Mardi Gras sa adlaw’ng Domingo.

Subay sa rekord sa Sinulog Foundation sukad kagahapon sa udto moabot pa og 27 ang tanang contingents nga naka-parehistro, 20 niini alang sa Free Interpretation Category (FI) ug pito lang sa Sinulog Based Category (SB).

Matud ni Michael Pepito ,in-charge sa registration sa Sinulog Foundation dihang nahinabi sa Banat News kini wala pay labot sa 20 ka mga mananaug sa Sinulog sa Kabataan sa lalawigan ug Sinulog sa Kabataan sa Dakbayan nga kagahapong adlawa palang nangayu og kopya og porma sa registration ug karung adlawa gipaabot nga mosumiter.

Samtang sa float category moabot na og 31 ang nakaparehistro, 24 alang sa higantes ug 19 sa puppeteers.

Samtang moabot og siyam ang mga out of town contingents nga nakaparehistro na nga gipangulohan sa Tangub City ang kampyon sa Sinulog Based category sa nakalabay’ng tuig ug ang Placer Masbate nga kampiyon sa Free Interpretation category sa miaging tuig gihapon.

Ang ubang out of town contingents mao ang Kidapawan sa Cotabato Province, Pintados sa Tacloban City, Lubi-lubi Festival sa Surigao Del norte, Tribu Sinandurot sa Dumaguete City Negros Oriental, Lanao Del Norte, Ormoc City, Abuyog Leyte ug South Cotabato.

Hinuon napanglantawan ni Sinulog Foundation executive director Ricky Ballesteros nga karung adlawa ug hangtud ugma atol sa deadline mag-abot abot ang ubang magpa-rehistro nga contingents. Samtang si Mayor Michael Rama mipahibalong motuyok na sa Fuente Rotonda ang carousel route sa Sinulog Grand Mardi Gras ug nanawagan sa maagiang mga establisamento nga dili magbutang og sound system.

Kini aron di malibog ang mga contingents asa nga tukar ang ilang paminawon atol sa ilang pagsayaw, mihangyo usab si Rama sa mga establisamento nga mohatag bisan nalang tubig sa mga mobantay sa parada. (BANAT NEWS)