Mga building giinspection na
CEBU, Philippines - Walay mga dagkong kalapasan sa lagda sa building code ang mga establisamento ingon man mga boarding ug lodging house dinhi sa dakbayan sa Sugbo subay sa labing ulahing pakisusi nga gihimo sa mga sakop sa Office of the Building Officials (OBO).
Matud ni Engr. Josefa Ylanan, ang acting chief sa OBO nga may mga ginagmay lang nga kalapasan sa lagda sa building code ang ilang nasigpatan sa mga lodging ug boarding house dinhi sa dakbayan.
Hinuon ila nang gipadad-an og notisya ang mga tagdumala niini aron kini makurehian dayon sa labing daling panahon aron paglikay sa mga disgrasya sama sa sunog.
Si Mayor Michael Rama maoy miluwat sa kamandoan sa pagpasusi sa tanang mga boarding house ug lodging house dinhi sa dakbayan pagtino sa kaluwas niini human sa nahitabong dakong sunog sa usa ka hotel didto sa Tuguegarao City nga mikalas og l6 ka mga kinabuhi diin 10 niini mga nursing graduate nga mokuha unta og board exam.
Matud ni Ylanan nga subli silang mohimo og inspeksyon sa maong mga edipisyo karong Enero 2011 nga maoy ilang routine inspection aron pagsiguro kun gituman ba sa mga tag-iya niini ang ilang giduso nga notisya pagkurehir sa mga ginagmay’ng depekto sa ilang mga edipisyo aron pagtuman sa lagda sa building code.
Kini taliwala usab sa ka busy ug paghuot sa mga tawo ingon man mga local ug langyaw’ng turista nga mobisita sa dakbayan aron mosaksi sa tinuig nga Sinulog mardigras. (BANAT)
- Latest
- Trending