Nangihi gipusil naangol

CEBU, Philippines - Kritikal ang kahimtang sa usa ka 20 anyos nga lalaki human kini pusila sa wala hiilhing kriminal samtang nagtuman kini sa sugo sa lawas didto sa may dalan F. Ralota St., barangay Poblacion siyudad sa Danao kagahapon sa alas 12:50 sa sayong kaadlawon.

Ang biktima mao si Kim Olager Perez, 20 anyos, ulitawo, way klarong trabaho nga taga barangay Sandayong Norte, sa maong dakbayan,

Si SPO4 Edgar Gomez sa Danao City Police Station mibutyag sa Banat News nga ang biktima kauban sa iyang mga barkada nag-inom sa usa ka tindahan sa maong lugar.

Apan ang biktima nananghid sa grupo nga mangihi sulod sa C.R. apan wala kini makabantay nga gisundan siya sa kriminal kinsa miluthang kaniya                  

Ang biktima nga naigo sa walang bahin sa abaga ug daling gihatud sa mga kauban niini sa Danao City District Hospital apan tungod sa iyang seryosong kahimtang gi-transfer dayun ngadto sa tambalanan sa dakbayan sa Sugbo.

Ang kapolisan padayon pang miimbistigar sa maong hitabo aron sa pagtumbok sa motibo sa krimen.

Hinuon ang teyoriya sa kapolisan nga hinungdan sa pagpamusil mao ang bahin sa panagribal sa nagkadaiyang grupo sa fraternity sa maong dakbayan. (BANAT NEWS)