Duha patay sa bangga

CEBU, Philippines - Duha ka tawo ang namatay ug usa ang grabeng naangol sa managlahing aksidente sa dakbayan sa Mandaue niadtong milabay’ng adlaw ug kagahapon.

Ang namatay mao sila si Tommy Romano, 26, nga taga Yati, Liloan ug Cesar Antinero, 26 nga taga barangay Tabok sa dakbayan sa Mandaue ug grabe usab nga naangol ang backrider nga si Jonathan Cose, 18.

Si SPO4 Vicente Benabaye, traffic investigator sa Mandaue City Police Office (MCPO) nga nahinabi sa Banat News miingon nga gikan sa lungsod sa Consolacion si Romano paingon sa dakbayan sa Sugbo.

Dugang pa niya nga sa paghidangat sa national highway sa barangay Basak sa dakbayan sa Mandaue gikadasmag niini ang multicab nga puno sa pasahero nga gimaneho ni Frederick Alilin, 20, taga Casili sa lungsod sa Consolacion.

Gumikan sa kusog nga impact ang motorsiklo nga giluwanan ni Romano nalamba sa sementadong karsada sa maong dapit nga maoy hinungdan sa grabeng kadaut sa kalawasan niini.

Gidala ang biktima sa Mandaue City District Hospital apan gideklarar kini sa mga doktor sa maong tambalanan nga dead on arrival.

Samtang ang laing aksidente nahitabo usab sa dalan M.C. Briones sa Sudlon, Maguikay sa miaging buntag dihang ang van-type nga delivery nga sakyanan nga gimaneho ni Felix Delator,36, nga migawas sa eskina Sudlon ug miliko kini paingon sa lungsod sa Consolacion.

Si Antinero nga gikan pa sa Consolacion ug paingon sa dakbayan sa Sugbo dihang kalit nga gisungag sa van-type delivery truck nga gimaneho ni Delator.

Matud pa ni SPO4 Benabaye nga gumikan sa kusog nga impact sa maong panagsungag si Antiner ug ang backrider nga si Cose nangalamba sa sementadong karsada nga maoy hinungdan sa grabeng kadaut sa ilang kalawasan.

Ang duha gidala sa Mandaue City District Hospital apan si Antinero nga maoy nagrabehan ang gideklarar sa mga doktor sa dead on arrival. (BANAT NEWS)