Militante misaway sa stand ni vidal

CEBU, Philippines - Ang militanteng Akbayan misaway kang Cebu Archbishop Ricardo Cardinal Vidal sa gihulagway nilang pagpakabuta-bungol niini sa giingong pag-promote ni Pope Benedict XVI sa paggamit og condoms.

Si Leloy Claudio, Akbayan National Youth Chairperson miingon nga dismayado sila kang Vidal ug misaway sila sa mga pro-life advocates tungod sa wala nila pagdawat sa kamatuorang dakong problema karon pagburot sa populasyon.

“Nabalitaan ko po na si Cardinal Vidal ay nag-bibibingihan sa sinabi ng Santo Papa that there are certain circumstances na pwedeng gumamit ng condom,” matud pang Claudio.

Si Vidal atol sa Vigil for All Nascent Human Life niadtong Sabado miklaro nga nasayop pagsabot sa mga tawo ang pamahayag sa Santo Papa kabahin sa gipakitang pagka-responsable sa mga mugbo og lupad nga modemanda na karon sa ilang mga kostumer paggamit og condom.

Gipasabot ni Vidal nga wala gisugyot sa Santo Papa ang paggamit og condom sa pamahayag niini.

Sumala pang Claudio, ang paggamit og condom usa ka pamaagi aron mahatagan og tsansa sa katawhan aron mamahimong responsable sa ilang desisyon.

Ang grupo kusganong misuporta sa gilalisan karong Reproductive Health Bill nga gisupak usab sa simbahan.

“RH-Bill is meant to protect the rights of individuals and we believe that family planning is a fundamental right and a woman’s right as well,” matud pang Claudio. (BANATNEWS)