Kapitolyo mopalit og mga pumpboat

CEBU, Philippines - Si Gobernador Gwen Garcia sa lalawigan sa Sugbu naglaraw sa pagpalit og mga pumpboat aron magamit sa mga miyembro sa Bantay Dagat sa kalungsoran alang sa gihingusgang kampanya batok sa illegal fishing.

 Matud pa ni Garcia nga nakita niya ang panginahanglanon sa pagpalit og mga pumpboat aron magamit kini sa pagpatrolya sa kadagatan sa matag lungsod.

 Si Garcia miingon nga iyang gihatagan og pagtagad ang sumbong ni Mayor Ricky Ramirez sa Medillen nga ang ilang Bantay Dagat walay katakus sa paggukod sa mga illegal fisher sanglit sangkap sa mga modernong ekipo ug kusog pa modagan ang mga motor bangka sa mga illegal fisher.

 Sigun pa sa gobernador nga kinahanglan nga sangkapan og mga ekipo ang mga lungsod nga mopakita og kaisog sa paggukod niadtong mga illegal fisher ilabi na sa kadagatan sa ika-upat nga distrito.

 Hinuon ang gobernador miawhag sa Philippine Navy nga mopatrolya sa maong dapit aron masikop ang giingong mga illegal nga panagatan nga may dalang armas aron ipusil niadtong manghilabot sa ilang illegal nga pangisda. (BANATNEWS)