Power supply balik na - VECO

CEBU, Philippines - Gipahibawo sa Visayan Electric Company (VECO) nga wala nay angayang kabalak-an ang publiko tungod kay hingpit nang nahibalik sa normal ang kinatibuk-ang suplay sa kuryente sa ilang franchise area sa Metro Cebu pagkakarun.

Gibutyag sa tigpamaba sa VECO Ethel Natera atol sa interbyu sa usa ka sibyaanan   nga sukad niadtong Biyernes sa gabii nabalik na sa normal ang kinatibuk-ang panginahanglan sa kuryente dinhi sa Sugbo.

Gani giklaro niya nga ang mga masinating mga brownouts matag karun ug unya usa lang kini ka scheduled power interruption tungod sa gihimong upgrading sa ilang mga linya ug dili na ang kakulang sa kuryente.

 Niadtong milabay’ng semana tagtulo ka oras nga rotation brownout nga gipatuman sa VECO sa ilang franchise area tungod sa gibanabanang moabot sa 300 megawatts nga pagkulang sa suplay sa kuryente human sa pag-trip off sa linya sa National Grid Corporation of the Philippines nga nagkutay sa duha ka planta sa Cebu Energy Development Corporation (CEDC) sa siyudad sa Toledo ug ang kapakyas sa ubang planta nga nag-suplay kanila og kuryente gikan sa Kabisay-an.

Apan karon normal nang nabalik ang operasyon sa ilang power providers. Sa report sa TV Patrol Central Visayas gipahibalo sa Veco nga kinahanglang makakita sila og dugang power supplier.  (BANATNEWS)