Banat ( Leaderboard Top ), pagematch: 1, sectionmatch: 1

P4.8 milyones CCTV camera gibutang sa 2 taytayan

CEBU, Philippines - Pormal nga gisubhan ang P4.8 milyones nga close circuit television(CCTV) cameras nga gipamutang sa duha ka taytayan nga nagkutay sa dakbayan sa Mandaue ug Lapulapu sa milabay’ng gabii.

 Personal nga gitambongan ni Gob. Gwendolyn Garcia, Presidente sa Liga nga mga Provincial Mayor nga si Nelson Garcia, Lapulapu City Mayor Paz Radaza, Mandaue City Vice Mayor Glen Bercede, Lapulapu City Vice Mayor Marcial Ycong ug mga konsehales sa Mandaue ug Lapulapu ang maong kalihukan.

 Matud pa ni Gob. Garcia dako kining kalambuan sa pagsulbad sa dagan sa trapiko, krimen ug tanang mga nanghitabo sa duha ka mga taytayan. Ang 40 ka mga CCTV cameras gibutang sa nagkadaiyang anggulo sa maong taytayan.

Dali usab makita ang mga batan-on nga mahilig kaayo sa “vandalism” ug sa pag-ila kanila aron sila panakpon.

 Gawas sa agianan sa mga sakyanan, apil sa makuha sa camera mao ang Mactan Channel ug makuha usab ang tanang mga barkong mosuong sa ilawom niini.

 Matud pa ni Garcia nga dali na unya ang pag-ila sa barko nga makahimo og danyos sa maong mga taytayan susama sa nahitabo sa milabay’ng mga tuig nga dunay barko nga mibangga sa maong taytayan ug naglisod sila sa pag-ila kung kinsa ang responsable niini.

 Ang 40 ka CCTV camera adunay “public address systems” nga makahatag og warning sa mga kalihukan palibot sa maong taytayan nga gituyo alang niadtong mga tawo nga adunay planong buhatong dautan lakip na niadtong mga tawong buot maghikog susama sa mga nangaging mga bulan nga adunay mga misuway paghunos sa ilang kinabuhi pinaagi sa pag-ambak ngadto sa ubos.

 Ang maong mga camera adto monitoron sa mga monitoring station sa Traffic and Security Monitoring System (TSMS) nga adunay direktang koneksyon sa kapolisan sa dakbayan sa Lapulapu ug Mandaue, PNP Maritime ug sa Philippine Coast Guard.

 Gipasalamatan ni Mayor Radaza ang mga sakop sa Mactan Cebu Bridge Management Board sa pagbutang sa mga CCTV cameras gumikan kay dako kining tabang sa pagsulbad sa kriminalidad sa dakbayan sa Lapulapu ilabi na ang ilawon sa 2nd Mactan Mandaue Bridge nga kanunay may mahitabong krimen.

 Samtang si Mandaue City Vice Mayor Glen Bercede sa iyang bahin mapasalamaton sa maong proyekto nga nahatagan na gyud og katumanan gumikan kay dali ra masulbad ug makita ang mga sakyanan nga gigamit sa usa ka kriminal nga moagi sa duha ka taytayan tungod kay mahimong ma-pokus ang mga sakyanan ug masayran ang detalye kung kinsa ang tag-iya niini.   (BANAT)

  • Follow Us: