Banat ( Leaderboard Top ), pagematch: 1, sectionmatch: 1

Quiño mosang-at og petisyon sa Supreme Court

CEBU, Philippines - Ang abogado ni Compostela mayor-elect Joel Quiño nagkanayon nga ang iyang kliyente nagtinguha nga moduso og petisyon for prohibition ug ingon man petition for certiorari ngadto sa Korte Suprema karong sunod nga semana.

Kini aron did-an ang Commission on Elections sa padayon nga pagpatuman sa suspensyon sa deklarasyon sa kadaugan sa mga napiling opisyales sa lungsod sa Compostela.

Sumala pa ni Atty. John Cane nga ang maong petisyon ilang isang-at sa labing daling panahon human gibasura ang ilang motion for reconsideration sa second division sa Comelec Manila nga naghangyong palingkuron na nga napiling opisyales tungod kay naapektuhan na pag-ayo ang mga basic services sa maong lungsod.

Iyang gitataw nga ang hangyo ngadto sa Korte Suprema mao nga dili lamang iapil sa pagkasuspenso sa proklamasyon sa Comelec ang mga nakadaug nga kandidato sa pagkabise-mayor ug mga konsehales.

Gumikan kay wala man sila malakip sa election protest nga giduso sa napilding mayor nga si kanhi mayor Ritchie Wagas.

Matud pa ni Cane nga tugutan unta nga makalingkod ang bise mayor ug magsilbing acting mayor lakip na ang mga konsehales sanglit ang gikwestyon nga botos ni Wagas mao ang mga botos ni mayor elect Joel Quiño.

Dugang pa niini nga nagmalaumon silang mahatagan og pagtagad sa Korte Suprema ang ilang petisyon.

Ang kampo ni Wagas gustong ipa-manual recount ang mga balota sa milabay’ng eleksyon gumikan sa mga gipasangil nilang iregularidad sa paggamit sa Precinct Count Optical Scan machines. (BANAT NEWS)

  • Follow Us: