Banat ( Leaderboard Top ), pagematch: 1, sectionmatch: 1

Prangkisa sa tourist bus gisuspenso

CEBU, Philippines - Gisuspenso na ang prangkisa sa tanang mga sakyanan sa JD Tours and Rent A Car samtang magpadayon ang imbestigasyon sa nahitabong trahedya sa pagkahagbong sa usa sa mga sakyanan nga mikalas og 21 ka Iranians ug mga Pilipino niadtong milabay’ng adlaw.

Ang maong kompanya nga gipanag-iya ni Marcelyn Moremon gidid-an una sa pagbiyahe hangtud nga dili matapos ang imbestigasyon sama sa kaluwasan sa mga pasahero, drayber ug kondisyon sa mga bus niini.

Nunot kini sa pagkahagbong sa bung-aw sa usa sa ilang mga bus nga gisakyan sa mga tinun-ang Iranian ug kaubanang mga Pilipino medical professionals diha sa Trans-Central Highway sa barangay Cansomoroy lungsod sa Balamban.

Si assistant transport Secretary Alberto Suansing mimando sa director Benjamin Go sa Land Transportation Franchising and Regulatory Board-7 (LTFRB) pagsuspenso sa operasyon sa maong bus tours human niya personal nga gisusi ang dapit sa gikahagbungan kagahapon.

Matud pa ni Suansing nga ang kamandoan nagagikan ni LTFRB chairman Jimmy Pesigan samtang usa ka team sa mga imbestigador gikan sa LTFRB o ba kaha Land Transportation Office (LTO) ang gitahasan paghimo og linaing pakisusi sa nahitabo.

Si LTO-7 director Raul Aguilus sa report sa TV Patrol Central Visayas mibutyag nga hasta ang mga plaka sa tanang 30 ka units sa maong kompanya i-suspenso samtang nagpadayon ang imbestigasyon.

Dugang pa niini, gidid-an na usab ang mga dagkong bus nga makaagi sa maong dalan aron paglikay sa samang trahedya.

Ang hepe sa Cebu Police Provincial Office (CPPO) Sr. Supt. Erson Digal gimandoan nga did-an na ang mga dagkong bus pasaheroan ug tourist buses sa maong highway ug kini gisangon usab ni Digal sa hepe sa Balamban police station nga si Chief Insp. Resty Santos.

Giawhag usab ni Digal ang mga hingtungdang lokal nga kagamhanan sa dakbayan sa Sugbo ug Balamban nga magbutang na og warning signs ingon man road signs sa maong lugar aron magiyahan ang mga motorista ilabi na kadtong dili pa kabisado sa maong lugar.

Subay sa pasiunang imbestigasyon sa kapulisan usa sa gidudahan mao ang mechanical error sa bus ang hinungdan nganong wala na makapugong ang brake sa maong bus nga adunay sakay kapin sa 50.

Sukad kagahapon miabot na og 21 ang patay nga mga Iranian nationals apil na niini ang drayber nga si Jaime Batoon nga kapuyo sa tag-iya sa JD Tourist Bus nga si Marcilyn Moremon ug sobra sa 20 usab ang angol.

Si Moremon sa report sa TV Patrol Central Visayas mihangyong dili lang basulon ang tanan kang Batoon gumikan kay nakalasan usab sila og mahal sa kinabuhi.

Matud pa ni Moremon nga mainampingon kaayo magmaneho si Batoon. Sumala pa sa maong report mao pa kini labing unang higayon nga miagi si Batoon diha sa maong lugar nga nagmaneho og susama kadako nga sakyanan.

Samtang mipadayag si Moremon nga patas lang unta ang himuong imbestigasyon sa awtoridad sa maong hitabo. (Darrel Carumba ug Chester Abadilla)

  • Follow Us: