Magsuong pusher nasikop
Managsuon nasikop kagahapon sa alas 5:00 sa buntag ug nakuha sa ilang posisyon ang mga ginadiling drugas ingon man kahimanan sa pag-suyop niini sulod sa ilang pinuy-anan diha sa sitio Sandayong, barangay Upper Lipata, Minglanilla ning dakbayan.
Sila si Jose Antonio Obanque, 36 ug ang igsuon niining si Jose Eipedio ang wala maka-ugpo dihang gi-ronda ang ilang panimalay sa mga sakop sa Criminal Investigation and Detection Group (CIDG-7) ug sa Philippine Drug Enforcement Agency (PDEA-7) pinanguluhan ni PSI Richard Caballero, pinasikad sa search warrant nga giisyu ni Regional Trial Court Judge Fortunato De Gracia Jr. sa Branch 25.
Nakuha gikan sa posisyon sa managsuon ang 2 ka mga gagmay’ng pakete nga shabu, usa ka medium pack sa pinaugang dahon sa marijuana, lima ka mga punoan sa marijuana, P850.00 nga gituohangg halin niini ingon man sa mga paraphernalia sa gidiling drugas.
Sa gipahigayong operasyon sa kapolisan dihang mosulod na unta kini sa pinuy-anan sa mga suspetsado si Jose Elpideo nakadagan pa kini ug miagi sa luyong pultahan apan nasikop ni SPO1 Williard Selibio ug nakuhaan usab og usa ka gamay'ng pakite nga shabu ug duha ka roll nga tin foil.
Ang duha gi-presentar kagahapon ni Superintendent Rex Derilo ang deputy for operation sa CIDG-7 diin gipahibalo usab niini nga si Jose Antonio ni-plead guilty na kini sa samang kaso niadtong 1998, nadakpan og balik niadtong 2000 ingon man karong 2008.
Samtang ang manghod niini nga si Jose Elpedio nasikop usab kini niadtong 1991 sa samang kaso, apan pagka 1992 naka-avail kini sa probation ug nakagawas.
Apan pagka 1997 gi-revoked ang maong probation hinungdan nga nasikop kini niadtong 2003 pinaagi sa warrant of arrest apan naka-avail sa parole niadtong 2006 hinungdan nga nakagawas apan nasikop na usab og balik kagahapong adlawa.
Ang managsuon nga niatubang sa mga sakop sa medya mipadayag nga kawad-on maoy nakatumbok kanila sa pagsulod sa maong negosyo.
Giklaro niini nga ang source sa drugas ilang nakuha gikan sa Pasil ning dakbayan gani mokita sila og P8 mil kapin sulod lang sa upat ka adlaw sa ilang puhonan nga P4 mil.
Ang duha kasamtangan karong gitanggong sa karsel sa CIDG-7 samtang gihikay pa ang tukmang kaso batok nila.
Samtang nasakmit usab sa CIDG-7 ang upat ka mga .45 kalebreng pistola, upat ka mga 45 magazine, tulo ka revolver cylinder ug usa ka kahon nga gisudlan sa mga assorted gun spare parts niadtong Martes sa alas 2:30 sa hapon didto sa barangay Poblacion dakbayan sa Danao.
Ang pagpangronda pinasikad sa search warrant nga giisyu ni RTC branch 19 Judge Ramon Codilla, sa panimalay sa ginganlan og Reynaldo Bayo ‘Aka” Naldo kinsa gikatahong nalambigit sa gunsmithing ug gun color-plating.
Ang pagpangronda gipangulohan mismo ni PSupt. Rex Derilo uban sa Special Operations Team apan ang wala mailhing mga trabahante sa maong manghimoay og armas daling nakasibat agi sa ubang mga panimalay nga tapad lang usab sa panimalay sa suspetsado nga nakasibat.
- Latest
- Trending