Banat ( Leaderboard Top ), pagematch: 1, sectionmatch: 1

Covenant Run on Hope '10 mabulukon

CEBU, Philippines - Kapin sa libo ang miapil sa gipahigayong Covenant Run on Hope (Honest Orderly and Peaceful Election) nga naglangkop sa Philippine National Police (PNP), Armed Forces of the Philippines (AFP), Philippine Drug Enforcement Agency (PDEA)-7 Dilaab Foundation, non-government organization, Kapisanan ng mga Brodkaster sa Pilipinas (KBP) ug mga opisyales sa simbahang Katoliko Romano ug Commision on Elections (Comelec).

Si PNP chief Jesus Versoza nga maoy pinasidunggang dinapit sa maong kalihukan ug maoy nangulo sa tulo ka Police Regional Office 6,7 ug 8 nagkanayon nga ang iyang pag-anhi kagahapon mao ang pagpahigayon og covenant signing sa tanang ahensya sa gobiyerno.

Tumong ug tuyo niini mao ang pagsinaaray pagkab-ot sa limpyo, hapsay ug malinawon ang umaabot eleksyon sunod buwan sa tibuok Pilipinas ilabi na dinhi sa Sugbo.

Tungod niini, nanawagan si Versoza sa katawhan ilabi na sa mga politiko ug sa tanang ahensya sa gobyerno nga motampo ug mobarog nga malinawon ang piniliay sunod buwan.

Mitug-an siya nga ang Sugbo maoy ikaduha sa Luzon diin sa miaging semana iya usab gipahigayon ang Covenant Run on Hope.

Sa wala pa ang covenant signing nga gipahigayon didto sa Archbishop Palace, dunay tulo ka dagkong tarpauline nga gipirmahan sa kapin usa ka libo nga mitambong sa maong kalihukan. Atol sa brisk walk kagahapon sa kaadlawon, ang mga dagkong opisyal sa kapolisan ug kasundalohan, sama kanilang PRO-7 Chief Supt. Lani-O Nerez, Centcom commander Lt. Col. Ralph Villanueva, Comelec Regional director Rene Buac maoy mikuyog ni Versoza paingon ngadto sa Archbishop Palace.

 Si Arsobispo Ricardo Cardinal Vidal kinsa wala moapil sa brisk walk kagahapon sa kaadlawon igo na lang nangomedya nga nagsakit iyang tiil maong wala siya makasalmot pagdagan sa mga dagkong opisyal.

Si Vidal nagkanayon nga ang kalihukan nagpakita sa panaghiusa pagkab-ot sa kahusay’g kalinaw sa piniliay sunod buwan. Adunay gipalupad nga kalapati human sa kalihukan. – BANAT NEWS

  • Follow Us: