Banat ( Leaderboard Top ), pagematch: 1, sectionmatch: 1

Tag-iya sa 16 kilos nga cocaine ilhon

Undersecretary Paul Clarence Oaminal

CEBU, Philippines - Si Undersecretary Paul Clarence Oaminal kinsa sa kasamtangan maoy acting chairman sa Dangerous Drugs Board (DDB) miawhag sa mga otoridad sa pagsusi sa tulubagong kriminal sa tag-iya sa kargamento ug sa van nga gikargahan sa 16 kilos nga cocaine nga nasakmit sa mga ahensya sa kagamhanan niadtong Disyembre 10, 2009 didto sa pantalan sa Sasa, dakbayan sa Davao.

Ang gimandoan ni Oaminal mao ang mga sakop sa Philippine National Police (PNP) ug sa Philippine Drug Enforcement Agency (PDEA) atol sa panagtagbo nga gihimo sa mga sakop sa DDB nga gisakpan sa taga Department of Justice (DOJ), Department of Finance (DOF), Department of Foreign Affairs (DFA), Department of National Defense (DND) ug lain pang 12 ka mga ahensya sa kagamhanan.

Kini may labot sa report sa taga Bureau of Customs nga gipangunahan ni Retired General Gualberto ug Police Director General Jefferson Soriano kalabot sa nasakmit nilang mga kargamentong cocaine.

Gitumbok ni Oaminal, ang gikargahang barko nga sa Maersk Line nga mao ang may tulubagong kriminal gumikan sa kalapasan niini sa Section 4 nga mao ang Unlawful Importation of Dangerous Drugs o sa Section 11 nga kabahin sa possession of dangerous drugs, ang tanan anaa sa Republic Act 9165.

Sa Section 30 sa maong RA 9165 bahin usab sa pagkahimong may tulubagong kriminal sa mga opisyal, mga partnership, corporation, association ug uban pang gitawag nga judicial entities.

Nasayran nga ang van nga gikargahan sa 16 kilos nga cocaine napalgan didto sa sulod sa yarda sa Maersk Lines.

Maoy hinungdan nga mimando dayon si Oaminal sa mga hingtungdang ahensya sa kagamhanan sa pagtapos na sa ilang imbestigasyon ug pagtumbok sa angayang manubag sa maong kargamento.

Gipugngan usab ni Oaminal ang lakang sa pagsunog sa maong mga cocaine tungod lang sa katarungan nga wala sila’y natumbok nga mga tawong responsable niini.

Matud pa ni Oaminal nga ang gidugayon una mabahas ug mawagtang ang maong kaso , molanat sa 20 anyos ug ang silot nga ipahamtang sa malapason mao ang life imprisonment.

Nahisgutan usab atol sa maong panagtagbo sa DDB nga mas labing maayo sa mga otoridadnga makigdugtong sa mga   otoridad sa Malaysia diin maggikan ang maong kargamento.

Si Oaminal maoy tagsulat sa libro nga Comprehensive Dangerous Drugs Act of 2002 nga maoy basihan sa mga huwes sa pagpakanaog og hukom niadtong   mga malapason sa balaod bahin sa ilegal nga paghupot sa ginadiling drugas. (Wen Celen)   (BANATNEWS)

  • Follow Us: