Pundok ni Radaza gidawat sa LAKAS

CEBU, Philippines - Pormal nga giendorsar ni Lakas Kampi-CMD presidential candidate Gilbert “Gibo” Teodoro ang team DERETSO 3 ni incumbent Lapulapu City Mayor Arturo Radaza ug asawa niining si mayoralty candidate Paz Radaza nga opisyal nga kandidato sa maong partido.

Atol sa pagbisita ni Gibo sa dakbayan sa Lapulapu sa milabay’ng semana sa Waterfront Hotel and Casino Mactan pormal nga gipahibalo ni Teodoro nga ang local nga partido ni Radaza maoy ilang suportahan sa umaabot nga piniliay sa dakbayan sa Lapulapu.

 Subay niini gisaad ni Gibo nga ang tanang suporta sa makinarya sa iyang partido ihatag usab nila ngadto sa mga kandidato ni Radaza sa 2010 nga piniliay gumikan kay nakita ni Gibo ang kalig-on sa iyang kandidatora sa dakbayan.

 Gikalipay usab ni Teodoro ang panaghiusa sa mga dagkong political clans sa maong dakbayan gumikan kay mosamot ang kalig-on sa ilang partido ug mamahimong malinawon ang natad sa politika sa maong dakbayan kung magkahiusa ang mga politikong pamilya.

 Si Radaza sa iyang bahin misaad ni Gibo sa ilang hugot nga suporta sa kandidatora sa dakbayan sa Lapulapu sa umaabot nga piniliay.  - Bong Soriano (BANAT NEWS)