LP may kandidato pagka-mayor sa Boljoon

CEBU, Philippines - Aduna nay lig-ong kandidato sa pagka- mayor didto sa lungsod sa Boljoon ang Liberal Party ni gobernatorial candidate Hilario “Junjun” Davide III alang sa umaabot nga piniliay sa tuig 2010.

Siya mao si Feliberta Fegarido Mubarak Obaid nga naila nga Inday Fegarido sa lungsod sa Boljoon kinsa pormal nang miduso sa iyang kandidatura sa pagka- mayor sa buhatan sa Comelec sa Boljoon atol sa deadline sa pag-substitute og kandidato niadtong milabay’ng Lunes.

Gihulipan ni Inday Fegarido si mayoralty candidate Sergio “Dongdong “ Lu nga usa ka iladong negosyante sa maong lungsod human niini isibog ang iyang gisang-at nga certificate of candidacy (COC).

Apil usab sa mi-file og COC isip substitute dungan ni Fegarido mao ang iyang runningmate nga si Bernard Amper anak ni kanhi Boljoon mayor Rene Amper uban sa ilang kinatibuk-ang linya sa mga kandidato pagka konsehal.

Si Fegarido mibutyag atol sa interview sa Bantay Radyo nga napugos siya pagdawat sa hagit nga magpapili pagka -mayor tungod usab sa awhag sa mga molupyo sa Boljoon ilabina na sa bukirang bahin nga nanginahanglan sa mga batakang serbisyo sama sa problema sa patubig og sugang dagitabnon.

Gitug-an ni Fegarido nga problema gyud nila ang supply sa tubig tungod kay alas 8:00 palang sa buntag wala nay mobuhagay nga tubig sa ilang mga agwas nga wala gyud kahatagi og kasulbaran ni Mayor Deogenes “Wargong” Derama.

Nasayran nga ang igsoon ni Mayor Derama nga si Celis Derama maoy mokandidato sa pagka-mayor sa maong lungsod hulip kang Wargong ubos sa One Cebu Kampi ni Gov. Garcia.

Nunot niini gipadayag ni Fegarido nga suportahan usab nila ang tanang kandidato sa Liberal Party gikan sa pagka -presidente og sa pagka gobernador nga sila si kanhi konsehal Davide sa dakbayan sa Sugbo, ug bise gobernador Greg Sanchez Jr.  - Darrel A. Carumba (BANAT NEWS)