Padung sa korte gibanhigan

CEBU, Philippines - Patay na nga miabot sa tambalanan ang usa ka lalaking padulong unta sa korte aron pagtambong sa iyang kaso human kini banhigi sa tulo ka mga tawong luwan og motorsiklo diha sa ML Quezon Highway sa barangay Pusok dakbayan sa Lapulapu kagahapon sa buntag.

 Ang biktima mao si Archie Nuñez Bahio, 35, residente sa barangay Mactan dakbayan sa Lapulapu nga usa ka furniture worker ug may kasong may kalambigitan sa illegal drugs diha sa Regional Trial Court Branch 53.

 Sa imbestigasyon ni SPO2 Rolito Jumao-as sa Crime Against Persons (Homicide) nasayran nga migikan si Bahio sa iyang panimalay mga alas 8:00 kagahapon sa buntag alang sa pagtambong sa iyang kasong giatubang.

Ang biktima luwan sa iyang motorsiklo samtang ang mga gikatahapan nagsunod usab sakay sa laing motorsiklo apan gibana-banang 300 ka metros gikan sa korte kalit kining gipusil sa maong mga tawo gikan sa likod.

 Bisan paman sa mga samad nga naangkon mipadayon sa pagpadagan og kusog ang biktima hinungdan nga kini gigukod ug giusban sa pagpusil sa mga mamumuno tulo ka higayon hangtud nga kini naabot sa may center island duol na sa korte ug diha na nahagba gumikan sa kadaghan sa dugo nga migawas sa iyang lawas. Ang mga tawong nakakita sa nahitabo kaniya daling mitabang ug midala kaniya sa Lapulapu City Hospital apan gideklarar kining patay na pag-abot sa tambalanan gumikan sa upat ka samad pinusilan sa iyang likod. Samtang ang mga gikatahapan daling mipasutoy sa ilang motorsiklo palayo sa lugar, ang mga tawo diha sa gihitaboan mibutyag sa kapolisan nga pulos nanagsuot og crash helmets ang mga gikatahapan ug di maklaro ang mga dagway.

 Matud pa ni PO3 Alfredo Datu sa warrant section nga si Bahio ilang nasikop pinaagi sa warrant of arrest sa kasong kalapasan sa RA 9165 Sec.11 Art. II gumikan sa paghupot og illegal nga drugas apan kini nakapiyansa sa RTC branch 53 sa sala ni Hon. Judge Benedicto Cobarde ug kagahapon laing hugna sa pagdungog unta sa iyang kaso ang himuon.  - BANAT NEWS