Sulpicio vessel makalawig na og balik

CEBU, Philippines - Human sa kapin usa ka tuig nga pagkasuspenso sa mga barkong pasaheroan sa Sulpicio Lines Inc. hingpit nang gitugutan ang usa sa mga barko niini nga MV Princess of the South nga makabiyahe sa Maritime Industry Authority (MARINA). Ang MV Princess of the South gitugutan na ni Marina administrator Ma. Elena Bautista human kini makakumpleto sa mga rekisitos nga ilang gipangayo human sa trahedya sa flagship sa Sulpicio nga MV Princess of the Stars niadtong Hunyo 21,2008 sa San Fernando, Romblon nga mikalas og kapin 600 ka tawo ug daghan ang missing.

Ang SLI hingpit nga nakakumpleto sa rekisitos sa maong barko nga naglakip sa insurance, safety management certificate (SMC) ug passenger ship safety certificates (PSSC) ug napulo ka certificates nga gipangayo aron makalawig og balik ang maong barko.

“MV Princess of the South, passed the inspection and shipboard audit and does not have outstanding deficiency, further recommending the lifting of the suspension order of the ship,” sumala pa sa pipila ka bahin sa resolusyon sa upat ka pahinang desisyon sa Marina nga gipadala sa maong buhatan dinhi sa Banat News.

Samtang ang ubang barko sa SLI nga wala pa makakumpleto sa mga rekisitos magpabiling di makalawig sumala pa sa maong kamandoan. Gipahimangnoan usab ang maong kompanya sa pagsunod sa mga nalatid nga kundisyones sa Certificate of Public Convenience (CPC) ug mga lagda sa Marina.

Usa sa mga labaw sa SLC nga gikahinabi sa Banat News apan nagdumili sa pagpahingalan mipadayag sa iyang kalipay sa maong desisyon sanglit nakabalik na og trabaho ang mga nangataktak nga crew sa MV Princess of the South.

Matud pa niini nga sunod nilang pabalikon sa trabaho ang mga crew sa uban pang barko nilang nasuspenso kun makumpleto na ang rekisitos ug matugutan na sa Marina, sa pagkakaron kapin sa 600 ka trabahante sa SLI ang nawad-an og trabaho samtang ang uban mibiyahe na sa abroad.

Ang MV Princess of the South mibiya na kagahapon alas-10 sa buntag gikan sa Manila luwan ang 52 ka mga crew ug upat ka sea marshalls sa Philippine Coastguard.

Gikatakda kining moabot karong hapon ang maong barko sa Pier 5 ilawom sa superbisyon ni Captain Ernesto Edar. - Edwin Ian Melecio (BANAT NEWS)