Banat ( Leaderboard Top ), pagematch: 1, sectionmatch: 1

Saway ni Tomas sa taga CCMC padayon

CEBU, Philippines - Wala pa mahuman pagsaway si   Mayor Tomas Osmeña sa mga tinugyanan sa Cebu City Medical Center (CCMC).

Ang mayor mihulagway karon sa mga doktor sa maong tambalanan nga susama og jeepney driver nga nagpatuyang lang og padagan sa kadalanan.

Kini subay usab sa sayop nga pag-diagnose sa usa ka 12 anyos nga pasyente nga namatay sa dengue apan kini unang giila nga tonsillitis.

Gipa-imbestigahan na hinuon ni Osmeña ang mga doktor nga nalambigit sa paghatag og sayop nga diagnosis alang sa pagtaktak niini.

Ang gusto sa mayor nga mahitabo sa mga mananambal sa CCMC nga kini masusama sa usa ka piloto nga mainampingon sa ilang trabaho.

“If you are a doctor you should think like a pilot, no mistake please kay usa lang ka sayop patay gyud ang tanan,” nagkanayon si Osmeña.

Nagtuo hinuon ang mayor nga lisod nang mausab ang kinaiya sa mga kawani sa CCMC ug magbaton og responsibilidad sa ilang mga pasyente.

Alang kang Osmeña nahimo nang batasan sa tanang empleyado sa nahisgutang tambalanan ang walay pagtagad sa ilang gialagaran.

Duna pa gihapon hinuoy nakita nga paagi ang mayor nga mapitol ang mga badlongon ug iresponsable nga mga kawani sa city hospital.

Kini mao ang paghatag og pasidaan ngadto sa mga empleyado nga tangtangon sa serbisyo kun makahimo og bisan unsang kasaypanan.

“Sige, bantay lang diha, you try it again out gyud ka, that they will follow, and that’s what I’m doing now,” dugang pamahayag ni Osmeña.

Subli usab nga gipahimangnoan sa mayor ang mga kawani sa CCMC nga dili mosinghag sa mga pasyente tungod kay siya dili makatugot niini.

Usa ka doktor usab sa CCMC ang girikumindar sa City Legal Office nga masuspenso og napulo ka adlaw tungod sa susamang kalapasan. – BANAT NEWS

  • Follow Us: