Banat ( Leaderboard Top ), pagematch: 1, sectionmatch: 1

"Polis Saringan" sa PNP gisaway kay usik-usik ra

Gisaway ni Cebu City Vice Mayor Michael Rama ang gilusad nga information drive sa kapulisan sa dakbayan, ang “Polis sa Saringan Suod sa Katawhan”.

Tumong sa nahisgutang programa nga mapaduol sa komunidad ang mga polis ug subling makuha niini ang pagsalig sa publiko ilabi na sa kabataan.

Ang kapulisan pinaagi sa Police Community Relations nisugod na pagsuroy sa mga tunghaan ug nipasabot sa mga tinun-an sa ilang gimbuhaton  ug responsibilidad sa publiko.

Lakip sa programa mao ang pagpasakay sa kabataan sa patrol car ug pagpahibawo   sa nagkadaiyang mga police station sa siyudad.

Apan matod pa ni   Rama   nag-usik-usik lang sa panahon ug resources ang kapulisan tungod kay giingong kini wala kinahanglana.

“Sus maryusep, gausik-usik lang sila ana sa kuarta ug panahon, nakahibawo na ang kabataan sa ilang katungdanan uy, bisan gani kadtong wala pa moeskwela,” sumala ni Rama.

“Ang angayan nilang buhaton, simple ra gyud, back to basic, tinud-anay lang sila nga mo-perform sa ilang trabaho, ana ra, kay makita man na sa mga tawo,” matod sa bise mayor.

Gitataw ni Rama nga nawad-an og pagsalig ang publiko ngadto sa kapulisan tungod kay giingong dili malimod nga dunay uban niini nga mga badlongon.

Ang bise  mayor nga maoy chairman sa Police Coordinating and Advisory Council (PCAC) niingon nga kuli nang mabalik ang pagsalig sa publiko ngadto sa mga pulis.

Kini kung dili malimpyohan ang PNP organization gikan sa mga sakop niini nga mga kurakot, protector sa mga illegal nga kalihukan ug uban pa.

Nagtoo hinoon si Rama nga daghan pa sa mga pulis ang sinsero sa ilang katungdanan, ug natabunan lang sa dili maayong kalihukan sa pipila nila ka mga kauban.

Partikular na niini ang pagpangilkil nga niresulta usab sa pagkasikop sa ubang mga pulis sa dakbayan pinaagi sa entrapment operation. (Elly Bolonos)

  • Follow Us: