Banat ( Leaderboard Top ), pagematch: 1, sectionmatch: 1

Dinakpan napatay sa polis

CEBU, Philippines - Napusilan patay sa polis ang usa ka giingong hubog nga lalaking nangilog og armas sulod sa detention cell sa Waterfront Police Station sa Cebu City Police Office kagahapon sa alas 2:45 kaadlawon.

Giimbestigar karon sa Homicide Section ang sirkumstansya sa kamatayon ni Mark Anthony Generali, 19, taga McArthur Boulevard sa barangay Tinago ning dakbayan nga napusilan ni PO2 Ramil Tanggol sakop sa miscellaneous team sa Waterfront Police Station.

Kini gumikan sa naangkong samad ni Generali diha sa sentro sa iyang sintido, tunga-tunga sa duha niya ka mga mata agi sa .9mm caliber pistol ni Tanggol.

Si PO2 Michael Codaste nga gikahinabi sa Banat News nagkanayon nga mga alas 12:45 sa kaadlawon gisikop si Generali ug gibalhog sa karsel sa maong police station human gireklamo’g physical injury sa iyang silingan nga si Asuncion Rosalasi.

Gikatahong bisan ang polis nga si PO1 Arman Pacaña nga kauban ni Tanggol nga miresponde sa alarma giingong gisuklan usab ni Generali atol sa pagsikop kaniya.

Matud pa ni PO2 Codaste, tungod sa kahubog ug ka-bayolente niini gibuwag siya og selda sa ubang dinakpan.

Ang pagpusil nahitabo dihang gikatahong kuhaon na siya ni PO2 Tanggol aron dalhon sa Cebu City Medical Center (CCMC) alang sa liquor test.

Apan gikatahong kalit nga giilog ni Generali ang service firearm ni PO2 Tanggol sa hawak sa naulahi hinungdan sa ilang paglinayugay pag-ilog sa armas.

Ning tungura kalit nga mibuto ang armas tumong sa sintido ni Generali, si Tanggol daling mitawag og mga kauban ug gidali pagdala sa Cebu City Medical Center si Generali apan gideklarar kining dead-on-arrival.

Si PO2 Tanggol boluntaryong mitahan sa ilang hepe nga si Chief Insp. Aureo Sanchez ug gi-turnover siya ngadto sa Homicide Section uban ang .9mm pistol ug usa ka magazine nga adunay 15 ka buhing bala.

Ang hepe sa Homicide Section nga si Sr. Insp. Mario Monilar nga gikahinabi sa Banat News nagkanayon nga ilang pasakaan og kaso karong adlawa si PO2 Tanggol.

Si Tanggol ug Generali parehong gipailawom sa paraffin test aron pagsuta kun pareho ba silang nakapabuto sa maong armas dihang sila naglinayugay.

Ang hepe sa kapulisan sa dakbayan sa Sugbu, Sr. Supt. Patrocinio Comendador nga gikahinabi sa Banat News mimando na sa Homicide Section sa pagpalawom sa imbestigasyon sa kaso.

Buot masusi ni Comendador kun nagpabaya si Tanggol maong gisayon-sayon kini ni Generali nga ilogan og armas nga miresulta hinuon sa kamatayon sa naulahi, nagpaabot pa ang CCPO sa pormal nga pagreklamo sa banay'ng Generali batok kang Tanggol.

Ang CCPO andam sa pagpangitag pamaagi sa pag-tabang sa maong police sa pagpangitag abogado hinuon ang kagamhanan sa dakbayan sa Sugbu naandan na niining moabag sa kapulisan sa dakbayan kun makasugat og problemang legal.

Andam hinuon pagtabang ang CCPO kang Tanggol sanglit “in-line of duty” dihang nahitabo kini apan mausab ra unya kini kun mogawas sa mga ebidensya nga di aksidente ang nahitabo.

Ang maong police gisuwayan unta nga makuhaan sa Banat News sa iyang habig apan natulog kini sa sulod sa karsel sa CCPO. - BANAT NEWS

  • Follow Us: