400 ka punoan sa marijuana gipangibot sa CIDG-7

CEBU, Philippines - Mokabat sa 400 ka mga punoan sa   marijuana nga hapit na motupong sa tawo gipanglarot sa mga sakop sa Criminal Investigation and Detection Group (CIDG-7) kagahapon sa alas 6 buntag diha sa Sitio Inaad ug Sitio Cantipla Dos, barangay Tabunan ning dakbayan sa Sugbu.

Si   Sr. Supt. Ramon Rafael   regional director sa CIDG-7 maoy mipresentar sa maong mga marijuana ngadto sa media. Mobalor kini og P200 mil.

Ang maong pagpanglarot sa marijuana milampos human ang grupo nila ni Chief Insp. Rogarth Campo nakig-alayon sa mga sakop sa Philippine Drugs Enforcement Agency (PDEA-7) inabagan sa mga barangay opisyal sa nahisgutang dapit.

Subay niini, duha ka mga caretaker sa yutang gitamnan nga sila si Jesus Radana ug Manolito Bacus   giimbitar sa CIDG-7 kagahapong adlawa aron   mopasabot kun nganong dunay mga marijuanang gitanom sa nahisgutang dapit.

Ang maong marijuana didto kini gitanom sa hilabihang kabakilid nga lugar sa nahisgutang dapit apan napalgan sa mga nag-roving nga mga sakop sa Barangay Intelligence Network (BIN) ug gi-report sa barangay.

Sila si Radana ug Bacus mihimakak sa maong mga tanom ug mipadayag nga pulos sila duna nay mga trabaho ug panagsa na lang kaayong maka-ugmad sa maong yuta gumikan sa ilang ka busy sa trabaho.

Hinuon mipasalig kini sa kapolisan ingon man sa mga barangay opisyal nga mokooperar gyud kun ugaling duna sila'y mahibaw-ang mga tawo nga responsable sa pagpananom sa marijuana.

Si konsehal Enemedio   Nara nga gikahinabi sa Banat News nagkanayon nga pirmanente na nilang mabantayan nga adunay mga marijuana nga gipananom diha sa ilang lugar apan gumikan sa ilang mga maabtik nga BIN dali ra usab kini nga masakpan.

Gibutyag niini nga sa nangaging mga bulan dunay duha ka residente sa ilang lugar nga nasakpang nagtanom og 20 ka kapunoan sa marijuana ug sa pagkakaron mikooperar na kanila ug sa kapolisan pinaagi sa pagpirma og kasulatan nga dili na gayud sila mananom. (BANAT NEWS)