Signal number 1 gilibkas na

CEBU, Philippines - Pormal nang gilibkas sa Philippine Atmospheric Geophysical and Astronomical Administration Mactan ang pagpaubos sa public storm signal number 1 sa bagyong Bising ang Sugbu ug bugtong ang amihanang Cebu nalang ang nagpabiling apektado subay sa labing uwahing weather bulletin nga gipagawas kagahapon sa alas 11 sa udto.

Gibutyag ni Ella Cumahig, weather forecaster sa Pagasa Mactan nga sa labing uwahing weather bulletin nagpakita nga alas 10 sa buntag kagahapon mibiya sa Sugbo ang maong bagyo.

Gawas sa amihanang Sugbu, ang ubang mga lugar nga pabiling gipaubos sa signal number one mao ang Eastern ug Western Samar, Biliran Island, Leyte Provinces ug Bohol.

Samtang sa Dinagat Island, ang mga lugar ubos sa signal number one mao ang Surigao island, Surigao del Norte, Surigao del Sur ug Agusan del Norte.

Matud ni Cumahig nga nausab ang direksiyon sa maong bagyo nga unang gi-forecast nga moigo sa habagatang bahin sa Sugbu.

Subay sa latest weather bulletin kagahapon sa alas 10 sa buntag nakit-an base sa satellite surface data nga nahimutang 30 kilometro amihanang silangan sa Surigao City nga dunay coordinates ang maong bagyo nga 9.9 northeast nga nagdala sa 45 kilometros matag oras nga gikusgon sa hangin gikan sa vicinity sa Dinagat Island.

Ang maong bagyo padayung nag-irog sa kasadpang amihanan kasadpan sa hangin nga gikusgon nga siyete kilometros matag oras.

Nunot niini moabot og 33 ka mga barko nga de pasaheroan ug cargo vessels ang gipanggaid sa Cebu Coast Guard ug wala tugoti nga makalarga diha sa pantalan sa Sugbu gikan pa niadtong Huwebes sa alas 6 sa gabii hangtod kagahapon.

Gibutyag ni 1st Seaman   Rudolph Alain Benolirao sa Cebu Coast Guard sa dihang   nahinabi sa Banat News nga sagad sa mga barko nga gipanggaid mobiyahe unta paingon sa Leyte, Bohol, Cagayan ug uban pang mga probinsya nga apektado sa bagyo.

Sa paghimo ning balita, gibutyag ni Benolirao nga nagpaabot na lang sila sa advice sa Pag-asa paglibkas sa maong bagyo aron katugotan nang makabiyahe ang maong mga barko.

Tungod sa bagyo, gisuspenso sa mga prinsipal ug administrador sa mga tunghaan ang klase sa kindergarten ug elementarya.

Si Department of Education-7 director Recarido Borgonia nagkanayon nga wala na magkinahanglan sa direktiba sa iyang buhatan ang mga tunghaan sa kindergarten ug elementarya pagkanselar sa klase. - Darrel Carumba ug Romeo Limpangog (BANAT NEWS)