Banat ( Leaderboard Top ), pagematch: 1, sectionmatch: 1

Kapitolyo 'naglibog' sa desisyon sa JVSC

Cebu - Gihatagan lang og pito ka adlaw sa Joint Venture Selection Committee (JVSC) ang kagamhanang probinsyal pag-apelar sa gipadangat niining resolusyon ngadto sa Kapitolyo.

Kini may kalabutan sa pagbasura sa JVSC sa motion for reconsideration nga giduso sa provincial government ngadto sa maong komitiba.

Miduso og mosyon ang Kapitolyo human ibasura sa JVSC ang eligibility requirement sa kagamhanang probinsyal pagpuhal sa proposal sa Filinvest Land Incorporated.

Kini may kalabutan sa pagpalit sa Filinvest ug napulo ka ektaryang luna sa SRP gawas sa paggamit og laing 40 ka ektarya pinaagi sa pagpakig-joint venture sa City government.

Matud sa chairman sa JVSC nga si City Administrator Francisco Fernandez nga kung dili moapilar ang Kapitolyo sa ilang desisyon i-award na ang gitinguha sa Filinvest.

Nasayran nga ugma na untang adlawa i-award sa JVSC ang 50 ka ektaryang luna sa SRP ngadto sa nahisgutang investor kun wala pa moduso ang Kapitolyo og motion for reconsideration.

Nagtuo hinuon si Fernandez nga dili na moapilar ang kagamhanang probinsyal sa ilang gipadangat nga resolusyon niadtong miaging adlaw.

Apan kung kini himuon sa Kapitolyo, kini giingong nanginahanglan usab nga modeposito og P125 milyones nga (non-refundable) dili na mauli nga katunga sa usa ka porsiyento sa kinatibuk-ang kantidad sa maong proyekto.

Nidugang ang City administrator nga adto na usab ang provincial government moapelar kang acting mayor Michael Rama ug dili na sa JVSC.

Apan gipakawalay bili lamang sa Kapitolyo ang desisyon sa JVSC, si Capitol Consultant on information, Rory Sepulveda nagduda sa desisyon tungod kay si Fernandez ra isip screening committee chairman lang ang mipirma niini nga usa ra ka recommendatory power ang gahum.

Matud pa ni Sepulveda nga ang ordinansa sa siyudad nagtumbok nga i-endorsar pa ang maong rekomendasyon ngadto ni acting mayor Michael Rama kinsa maoy may gahum sa pagdesider niini. 

Gikwestiyon usab niini ang P125 milyones nga bond kun sila moapelar tungod kay wala kini sa mga probisyon sa ordinansa sa dakbayan.

Ang resolusyon nagkanayon nga napakyas ang Kapitolyo sa kuwalipikasyon sa proposal nga 50.6 hectare development project diha sa SRP.

Matud pa, ang Kapitolyo na-disqualified tungod kay napakyas pagprobar sa ilang track record, legal personality, financial capability ug tactical expertise aron ilang i-develop ang 50.6 hectare nga portion sa SRP.

Kagahapon sa press conference, matud ni Sepulveda ang ilang apelar nga penetsahan niadtong Enero 5 ilang gi-address ngadto sa buhatan sa Mayor ubos sa balaod sa section IV paragraph 2 of the City ordinance No. 2154.

 “Our appeal is directed to the Office of the Mayor and not to the Joint Venture Selection Committee. Technically naglabad gyud among ulo kung unsaon namo pag-treat ni,” matud pang Sepulveda. - Elly Bolonos uban sa report nila ni Rey Pasaporte ug Chester Abadilla (BANAT NEWS)

  • Follow Us: