Duha tipi sa bangga

CEBU - Duha ang kompirmadong patay atol sa bangga sa duha ka motorsiklo niadtong Miyerkules sa gabii sa sitio Cayam barangay Colon dakbayan sa Naga.

Giila ang nangamatay mao sila si Basilisa Sanchez kinsa dead on arrival sa South General Hospital ug driver sa motorsiklong si Benigno Campos.

Base sa imbestigasyon sa kapolisan sa Naga, usa ka motorsiklong gimaneho sa usa ka Rogelio Dinoy nga padulong sa Sugbu maoy gikabangga ni Campos kinsa padulong usab sa habagatang bahin sa Naga.

Matud pa sa kapolisan misuway og overtake og sakyanan si Dinoy apan misampak hinuon kini sa gikasugat nga motorsiklo ni Campos nga may duha ka angkas nga sila si Sanchez ug Joel Saberon.

Tungod sa kakusog sa pagbangga maayong pagkaguba sa duha ka motorsiklo ug grabeng kadaut sa lawas sa mga nagsakay niini.

Si Campos ug ang mga angkas niini, daling gidala sa tambalanan apan dead on arrival na si Sanchez samtang nakabsan sad sa kinabuhi si Campos.

Wala usab masayri sa kapolisan kung diin gidala nga hospital si Saberon kinsa gihulagway usab nga naa sa talandugong kahimtang.

Si Dinoy gitanggong na sa kapolisan human sa insidente.           (BANAT NEWS)