Banat ( Leaderboard Top ), pagematch: 1, sectionmatch: 1

Pabuto gikumpiskar kay way mga permit

CEBU - Pito ka mga tindahan sa pabuto nga walay permit pagbaligya niini ang gironda ug nakuhaa’g mga pabuto diha sa barangay Babag dakbayan sa Lapulapu kagahapon sa buntag.

Matud pa ni Lapulapu City Police Office director Sr. Supt. Mariano Natu-el Jr. usa lamang ka joint routine inspection ang ilang gihimo sa mga namaligya og pabuto gikan sa barangay Canjulao hangtod na sa barangay Babag uban sa mga sakop sa kabomberohan sa dakbayan sa Lapulapu pinangulohan ni Lapulapu City Fire Marshal Sr. Insp. Ricardo Cornelio.

Atol sa maong inspection, nasuta nga adunay pito ka mga namaligya og pabuto nga walay lisensya sa pagpanghimo sa pabuto ug ingon man permit nga makabaligya niini diha sa firecracker zone.

Gibanabang mokabat sa P30 mil ang kantidad sa mga assorted nga pabuto ang nakumpiskar sa mga sakop sa kabomberohan ug kapolisan sa dakbayan sa Lapulapu ug gidala kini ngadto sa buhatan sa kapolisan.

Matud pa nila ni Natu-el ug Cornelio nga padayon ang ilang pagpaniid sa mga tawong namaligya og mga pabuto nga wala magsubay sa lagda nga ilang gipatuman.

Samtang si Cornelio sa iyang bahin mipasabot nga hangtod sa katapusang adlaw nga gihatag sa mga manindahay og pabuto sa firecracker zone magpabilin usab ang iyang mga firetrucks sa maong dapit aron dali kini nga makaresponde sa bisan unsang alarma sa sunog nga mugna sa pabuto. (BANAT NEWS)

  • Follow Us: