Drayber gikulata ngipon lubo

CEBU - Nalubo ang tulo ka ngipon sa usa ka drayber sa habal-habal human kini tabangi og kulata sa mga karnaper nga midagit sa iyang gimanihong motorsiklo sa miaging gabii didto sa sitio Nonoc, barangay Tabunok, dakbayan sa Talisay.

Ang biktima mao si Arnel Baron, 32, taga dalan Tabada, barangay Mambaling, dakbayan sa Sugbu.

Basi sa imbestigasyon sa mga polis nasayran nga si Baron sa sayo pa nagpaabot og pasahero sa ilawom sa flyover sa Tabunok dihang usa ka nagpaka-aron-ingnong pasahero mihangyo kaniya nga magpahatod ngadto sa sitio Nonoc, Tabunok.

Apan sa wala pa sila maabot sa eskina sa simbahan sa Mormons sa Nonoc, may laing duha ka wala mailhing lalaki nga mipara ug gipasakay usab ni Baron.

Matud pa sa biktima nga nakadagan lang siya og mga 100 metros gikan sa simbahan sa Mormons   ang  tulo ka pasahero kinsa magkauban ra diay, mimando sa pagpakanaog kaniya gikan sa iyang motorsiklo apan nagdumili siya.

Maoy hinungdan nga ang biktima gitabangan og kulata sa maong mga karnaper ug maayong pagkalubo sa tulo niya ka ngipon.

Dihang mitabisay na ang daghang dugo sa baba sa biktima, misakay dayon ang tulo ka tulisan sa iyang motorsiklo ug gibiyaan an biktima.