Giluba og gunting sa misis sa sundalo

Babaye giluba og gunting sa asawa sa sundalo human kini dudahing "kabit" sa bana niini human maabti diha sa panimalay sa managtiayon niadtong nakalabay'ng Sabado sa gabii diha sa Sitio Upper Matumbo barangay Pusok dakbayan sa Lapu-Lapu.

Sigun pa sa imbestigasyon ni PO3 William Homoc sa Homicide Section sa Lapu-Lapu Police nadunggaban og gunting sa walang bahin sa tiyan ug walang bukton ang biktimang si Sheila Lazaro, 22, minyo ug molupyo sa Sitio Seaweeds barangay Pusok sa naasoy'ng dakbayan.

Dali usab nga nakaikyas ug gipangita karon sa kapolisan ang suspek nga si Rollyn, asawa ni Sgt. Arvin (apelyido gipugngan samtang padayon pa ang imbestigasyon) nga gikatahong sakop sa Philippine Air Force ug molupyo sa nahisgutang lugar.

Base sa imbestigasyon sa kapolisan naabtan ni Rollyn si Sheila ug iyang bana nga si Arvin diha sa ilang balay pasado alas 11 sa gabii, maong sa kalagot niya milanit kini og gunting dayong dunggab ngadto sa babaye.

Wala hinuon mohatag og klarong pamahayag si Homoc kun unsang sirkumstansyaha pagkasakop ni Rollyn sa iyang bana ug sa biktima apan miangkon si Homoc nga mitumaw sa iyang imbestigasyon gipasanginlang uyab sa biktima ang bana sa suspetsado .

Dali usab nga nadala ang biktima sa Mactan Doctors Hospital samtang nakaikyas ang suspek diha sa maong lugar una pa moabot ang mga mirespondeng kapolisan.