Kalihokan alang buwan sa Sandugo gibuksan

Tagbilaran City - Pormal nga gibuksan sa miaging Biyernes (Hulyo 1) ang usa ka buwan nga kalihukan ning dakbayan kabahin sa pag-ila karong buwana nga Sandugo Month.

Si Gobernador Erico Aumentado, Mayor Dan Neri Lim sa dakbayan ingon man si Loy Palapos, ang Executive Director sa Sandugo Foundation maoy nangulo sa pagbukas sa kalihukan.

Gibuksan ang kalihukan karong buwana sa usa ka Trade Fair diha sa pantalan diin makita ang nagkalain-laing klase nga baligya nga barato ang presyo alang sa katawhan.

Si Gobernador Aumentado sa iyang bahin miingon nga dako ang iyang pagsalig nga makadani og daghang mga bisita ang kasaulogan karong buwana.

Ang kadagkuan sa foundation mihan-ay na karon sa nagkalain-laing kalihukan matag gabii.

Nalakip usab niini ang pagpili sa mahimong Miss Sandugo 2005.

Gipaabot hinuon nga hugopan ang kalihukan karong umaabot Hulyo 24 diin mao ang paghimo sa makasaysayanon nga pagtimaan sa paghigalaay diin gipatulo ang dugo nila ni Datu Sikatuna ingon man Fernando Lopez de Legaspi.