Osmeña nanghagit pustaanay sa diploma
CEBU, Philippines — Gihagit ni Cebu City Mayor Tomas Osmeña si kanhi mayor Michael Rama nga dawaton ang pakigpustaanay aron mahuman na ang isyu mahitungod sa iyang credentials.
Nihimo sa maong hagit si Osmeña human si Rama nikwestiyon sa educational background ni Osmeña.
“I am willing to bet 5-1 odds that I have a college degree. Their 10,000 for a chance to win 50,000. They can choose any amount they like. 50,000, 500,000, or 50M, I don’t care, because I know the truth, and I can prove it,” tipik sa post ni Osmeña sa iyang Facebook page.
Sigun ni Osmeña nga ang pasangil ni Rama pamaagi aron pagtabon sa giingong overpriced nga pagpamalit sa mga clamps diin ang niaging administrasyon nipalit og 100 Denver Boots Clamps (wheel tire clamp) nga ang kantidad matag unit P44,950 ug ang kinatibuk-ang nabayran niabot og P4,495,000.
Gikonsiderar kini ni Osmeña nga overpriced kay sa iyang termino ang kagamhanan sa siyudad nigasto lang og P845,700 sa wheel tire clamp sa susama nga gidaghanon.
Kahinumduman nga gihatagan na og katin-awan ni Osmeña ang isyu mahitungod sa iyang credentials diin nigradwar siya sa Xavier University-Ateneo de Cagayan De Oro niadtong 1972 sa kursong Agriculture Economics.
Apan wala dawata ni Rama ang pakigpustaanay ni Osmeña kay dili siya sugarol dungan sa pag-ingon nga mas maayong mogawas ang diploma ni Osmeña aron masulbad na ang maong pangutana nga dugay ra nga isyu sukad pa niadtong 1998.
“Karon makigpusta siya nako, ayaw ako iyang papusta kay dili mana akoy nangutana ana kaniadto pa, ako lang ng gibalik kanang estoryaha kay hangtud karon panahon pa sa pagsugod niya, lansar siya pagka-mayor niadto abot nalang lain niyang kontra, abot nalang si Alvin Garcia mao gihapon ng estoryaha, ipagawas lang aron mahuman,” sigun ni Rama. (BANAT NEWS)
- Latest
