Davide nasuko kang Tolentino
CEBU, Philippines — Nasagmuyo si Gobernador Hilario Davide III kang Provincial Administrator Mark Tolentino sa pagpatrabaho sa mga job order personnel sa Kapitolyo sa pagbutang og culvert gikan sa kontrobersiyal nga Balili property sa subdivision nga iyang gipuy-an.
Si Davide kinsa gikan pa sa South Korea alang sa East Asia Tourism Forum (EATOF) nagkanayon nga niadtong Martes niya nahinabi si Tolentino kabahin sa maong kontrobersiya.
"I was upset to the point nga nasuko ko'g maayo gyud kay in the first place, I was never really aware of this," matud ni Davide.
"I was upset for the whole thing...I told him frankly yesterday (Martes), nasuko ko, nahiubos ko nimo," dugang sa gobernador.
Gimanduan ni Davide si Tolentino nga ilang tubagon ang suwat sa Commission on Audit (COA) kalabot sa maong transaksiyon.
Matud ni Davide nga nagpadala ang COA niadtong Pebrero 8 apan nilarga na siya sa South Korea.
Ang COA nangayo og mga dokumento kalabot sa nahimong transaksiyon gikan ni Tolentino, ni Jone Sepe kinsa maoy hepe sa Provincial General Services Office ug Ramon Dumayac, ang acting provincial accountant.
Ang 14 ka dokumento nga gipangayo sa COA naglakip sa inventory sa box culvert gikan sa Balili property sa wala pa ang nahimong donasyon ug ang inventory sa culverts sa pagkakaron.
Apil nga gipangayo sa COA ang Requisition and Issue Slips alang sa maong culverts, request sa mga trabahante nga gipatrabaho sa maong mga culverts, kontrata sa Kapitolyo sa maong mga trabahante, ang dokumento nga nagsaysay sa nahitabong bayad sa homeowners association nila ni Tolentino, lakip na ang listahan sa mga opisyal sa maong asosasyon, registration certificate sa village association sa Securities and Exchange Commission ug sa Department of Labor and Employment (DOLE). Karong adlawa ang deadline sa pagduso sa maong mga dokumento nga gipangayo sa COA. (GMR) (BANAT NEWS)
- Latest