Pangangkon sa Osmeña, Kandungaw Peak sulbaron

CEBU, Philippines — Tigumon sa Kapitolyo ang mga opisyal sa Lungsod sa Badian ug Dalaguete aron pagsulbad sa bangi sa pag-angkon sa Osmeña Peak ug Kandungaw Peak.

Kini human ang opisyal sa Badian nipadala og suwat ngadto kang Bise Gobernador Agnes Magpale ug niangkon sa maong mga lugar ug nihangyo nga usbon ang impormasyon nga ang Osmeña ug Kandungaw Peaks sakop sa Dalaguete.

Ang maong mga peaks apil kini sa gikonsiderar nga tourist destination sa Lalawigan sa Sugbo nga adtoan sa mahilig og saka sa bukid o mga mountaineers.

Si Magpale kinsa maoy chairman sa committee on tourism and international affairs sa Provincial Board nagkanayon nga tapukon niya ang mga opisyal sa duha ka lungsod.

“Mao na ang atong i-settle,” matud ni Magpale.

Ang mga opisyal sa Badian naalarma nga gawas sa local ug social media bisan ang Department of Tourism (DOT) nagsugod na pag-ila sa maong mga tourist spots nga naa sa Dalaguete.

Matud sa mga opisyal sa Badian nga ang duha ka tourist spots anaa nahimutang sa Barangay Patong ug Sohoton sa ilang lungsod.

Ang Osmeña Peak ug Kandungaw Peak dali kini maadtoan kun moagi sa Mantalongon, Dalaguete.

Niangkon hinoon ang mga opisyal sa Badian nga wala pa sila kahimo o wala pay agianan gikan sa ilang lungsod padulong sa maong mga tourist spots.

Si Magpale nagdumili sa pagkomento kabahin sa maong isyu kung kinsa ang tinud-anay nga nanag-iya sa maong mga spots apan nisaad nga sulbaron kini sa Kapitolyo. (BANAT NEWS)