Lista sa mga nisupak sa EO atol sa Sinulog nahuman na

CEBU, Philippines — Nadawat na ni Konsehal Dave Tumulak, Deputy Mayor for Police Matters ug Chairman sa Committee on Public Order and Safety ang lista sa mga establisemento nga giingong wala mituman sa Executive Order (EO) nga gipagawas sa kagamhanan sa siyudad sa Sugbo atol sa Sinulog.

Si Mayor Tomas Osmeña nipagawas og kamandoan nga nagdili sa tanang mga establisamento sud sa 300 metros gikan sa rota sa Sinulog Grand Parade nga makapahigayon og street parties ug pagbaligya og ilimnong makahubog.

Ang tumong niadto sa mayor nga malikayan ang kasamok sa Sinulog dili sama sa mga nahitabo sa nangaging mga selebrasyon.

Ang lista i-endorsar ni Tumulak sa buhatan ni Osmeña ug ang naulahi na maoy mopahamtang og silot.

Matud ni Tumulak  ilaha gyung sukdon  kon ang maong mga establisamento nasulod ba gyud sa 300-meter radius.

Gipahibawo sab ni Tumulak nga duna say mga sari-sari store ang giingong misupak sa EO diha sa J. Llorente, Lorega-San Miguel ug New Imus Road ug ang tanan ipaubos  sa imbestigasyon ug posibleng ang silot nga ipahamtang sa ilaha dili ma-renew ang ilang business permits. (BANAT NEWS)