Gipasirad-ang bars nakatubag na

CEBU, Philippines — Nakatubag na ang tulo ka mga bars nga gipadad-an og show cause order sa kagamhanan sa Dakbayan sa Mandaue nga naglangkob sa MO2, Hitachi ug The Sentral niadtong Lunes. Ang maong mga bars nakalapas sa mga patakaran ug ordinansa sa siyudad tungod sa pagpahigayon og party bisan walay permit atol sa Sinulog.

Matud pa ni Mandaue City Legal Officer Omar Redula, ang MO2 Management nipasabot nga wala sila kahibalo nga ang organizer nga nipahigayon sa Sinulog Party sa ilang bar wala mokuha og permit gikan sa siyudad.

Samtang gipahimug-atan sa Hitachi ug The Sentral nga normal lang ang ilang operasyon nga gihimo ug dili kadto Sinulog parties apan wala lang nila makontrolar ang paghugop sa bagang duot sa mga kustomers.

Sumala pa ni Redula, aduna silay team sa City Legal Office nga nagtimbang-timbang sa mga gihimong pagpasabot sa management sa tulo ka bars, alang sa ilang himoon nga rekomendasyon pasirad-an ang maong mga establisamento o suspensohon ba kini.

Panghinaut ni Redula nga ang ilang gihimong lakang sa kagamhanan sa Mandaue, magsilbi nga leksyon sa ubang mga balay patigayon nga motuman lang gyud kung unsay anaa sa balaud ug kamanduan sa siyudad. (BANAT NEWS)