Rama ‘out’ na sa partido?

CEBU, Philippines — Dako kaayo ang pagtuo ni Cebu City Mayor Tomas Osmeña nga gipalagpot na sa Barug Team Rama isip mayoralty candidate sa piniliay sunod tuig si kanhi mayor Michael Rama human wala dawata ni Konsehal Joel Garganera sa Barug Team Rama ang iyang hagit nga pustahanay.

Kahinumduman nga gihagit sa mayor ang konsehal ingon man ang ubang miyembro sa oposisyon human adunay “insider” nga nag-ingong i-kick out sa grupo si Rama.

Miingon si Osmeña kun dili dawaton sa oposisyon si Rama isip mayoralty candidate sa eleksiyon sunod tuig modaog siya og P10,000 apan kon mapildi si Osmeña mobayad siya og P40,000 sa oposisyon.

Sa iyang bahin, si Garganera miasoy nga wala siya masayod kon unsay gibasehan  sa mayor sa iyahang pamahayag.

Kini midugang nga ang ilang partido padayon naghisgot mahitungod niini ug matod pa kabahin kini sa ilahang estratehiya.

Apan gihulagway ni Gargarnera nga nakulbaan si Osmeña kay wa kini ideya kon kinsa iyang makontra sa piniliay.

Giawhag hinuon ni Garganera ang mayor nga trabahoon unya ang mga problema sa siyudad sama sa traffic ug uban pa.

“I’ve been at odds with the Mayor for the last almost 30 years, since when man ko na nervous niya? Basin siya maoy gi-nerbiyos karon kay sige ra man og putak iyang baba. Besides, unsa may labot niya nga amo man ning partido, gusto siya motapon namo?” sigon ni Garganera.

Hangtud karon wala pay gipagawas nga pamahayag ang kanhi mayor kabahin niining maong isyu. (BANAT NEWS)