Trapik sa Tabunok medyo luag na

CEBU, Philippines — Nilugak ang dagan sa trapiko sa Barangay Tabunok, Dakbayan sa Talisay kagahapon sa buntag.

Kini human ang sakop sa City of Talisay-Traffic Operation Development Authority (CT-TODA) nigamit na sa temporaryong terminal dili layo sa flyover sa Tabunok.

Matud ni Almond Dela Peña, pangulo sa CT-TODA, nga gipasulod na nila ang mga pangpasaheroang jeep, traysikol ug habal-habal sa maong lugar nga adunay gidak-on nga moabot sa usa ka ektarya.

Asoy pa ni Dela Peña nga kapin sa 3,500 ka sakyanan ang mahimong masulod sa maong luna gawas lang sa traysikad.

Iyang gipasabot nga ang pagpakanaug ug pagpasakay og pasahero diha lang sulod sa temporaryong terminal.

Ang maong luna gipagamit lang una sa siyudad nga libre sa tag-iya samtang wala pa silay plano nga gamiton kini.

Si Dela Peña nagkanayon nga dako og epekto kay lugak na kaayo ang karsada ilabi na ubos sa flyover.

Usa sa mga sumasakay nga si Virginia Villamia nga taga Dakbayan sa Naga nibutyag nga lisud para nila nga molakaw pa padulong sa terminal apan maayo na lang kay limpyo ang lugar.

Hangyo lang sa mga drayber nga unta maaspalto ang lugar aron dili lapok panahon nga sige og uwan.

Hinoon ang maong lugar mahimong terminal lang samtang wala pa mahuman ang parkingan sa bag-ong merkado. (GMR) (BANAT NEWS)