Sinako nga uling gisakmit
CEBU, Philippines — Gisakmit ang 331 ka sakong giabandonar nga uling sa mga tinugyanan sa Department of Environment and Natural Resources (DENR) Enforcement Team atol sa ilang operasyon niadtong Enero 18 sa Barangay Bakyawan ug Caridad, Lungsod sa Tuburan.
Ang operasyon inubanan sa Municipal Environment and Natural Resources Office, Philippine National Police ug DENR personnel nga gikan sa Toledo City Station.
Dul-an sa usa ka gatos ka libo ka pesos ang balor sa uling nga nasakmit gikan sa duha ka barangay.
Matud ni DENR-7 Enforcement Division chief, Ariel Rica, nga ang Bakyawan ug Caridad gikonsiderar nila nga hotspot area sa ilegal nga tinubdan sa forest products.
Sumala pa ni Rica nga kanunay sila nakig-coordinate sa lokal nga kagamhanan sa Tuburan ug sa kapolisan sa pagpahunong sa nagkadaghan ug ilegal nga pagpamutol sa mga kahoy sa lugar.
Dugang pa ni Rica nga kung dili mahunong ang ilegal nga pagpamutol sa kahoy sa lugar, ilang buhaton ang pag-issue og moratorium sa issuance of certificate of tree plantation ownership.
Ang regional director sa DENR-7, Engr. Gilbert Gonzales, nitug-an nga ang pagpahigayon nila og regular surveillance ug operations maoy ilang pamaagi pagpalig-on sa ilang kampanya batok sa mga malapason sa forestry laws and regulations.
Ang mga nasakmit nga forest products ang anaa karon sa Tuburan-MENRO. (GMR) (BANAT NEWS)
- Latest