Migamay ang partisipante sa Suroy-Suroy sa Sugbo

CEBU, Philippines — Moabot ra ngadto sa 37 ka mga partisipante ang niapil karon sa Suroy Suroy Sugbo nga ipahigayon sa habagatang bahin sa Sugbo.

Kasagaran sa maong mga partisipante mga balikbayan sigon ni Joselito “Boboi” Costas ang pangulo sa Provincial Tourism Office.

Ang Suroy Suroy Sugbo Adventure Round South magsugod ni karong adlawa kon diin 13 ka mga lungsod ug dakbayan ang suroyon sa mga guests o partisipante.

Apan dili sama sa miaging mga suroy suroy nga moabot sa di momenus og 50 ang partisipante, karon mas gamay kini.

Usa sa gitan-aw nga hinungdan ni Costas mao nga ang mga turista mamahimo rang makasuroy didto sa south sa ilang kaugalingon tungod na usab sa kadali ra sa pagbiyahe padulong didto.

Ang package fee sa suroy suroy magdepende kini sa accommodation nga pilion sa mga turista, magsugod kini sa P8,000 ngadto sa P11,000.

Ang tulo ka adlaw nga kalihokan, nga magsugod karong adlawa, manukad kini sa Kapitolyo ug mobiyahe padulong sa Argao alang sa launching ug dayon sa Dalaguete, Boljoon, Oslob sa unang adlaw.

Sa ikaduhang adlaw, adto sila sa Santander, Samboan, Ginatilan, Alegria ug Moalboal ug apil sa ilang adtoan ang Aguinid Falls sa Samboan.

Sa ikatulong adlaw uwahing bisitahon sa mga turista ang mga simbahan sa Ronda ug Barili ug adunay cultural performance nga nagpaabot sa dakbayan sa Carcar ug  Talisay. (IBM) (BANAT NEWS)