P7M shabu ang nasakmit

CEBU, Philippines — Mokabat og 1.3 kilo nga shabu nga mobalor na og P7 Milyones ang nasakmit atol sa sagunsong buy-bust operations sa Philippine Drug Enforcement Agency-7 dungan sa kasaulogan sa Fiesta Senyor ug Sinulog 2018 sukad pa niadtong Enero 18 hangtud sa 21 didto sa Dakbayan sa Mandaue ug Dakbayan sa Sugbo.

Matud pa ni PDEA-7 Regional Director Emerson Margate nga niadtong Enero 18 sa gabii nadakpan nila sa Barangay Bakilid, Dakbayan sa Mandaue silang Nerissa Aguilar, Marichu Pestaño, Virginia Orge ug si Ruth Jimenez nga nasakmitan og 290 ka gramo nga shabu.

Pag Enero 20 sa kaadlawon nadakpan sab sa buy-bust operation silang Arvin Postrero ug Sheilamar Dela Torre taga Banawa, Guadalupe sa Dakbayan sa Sugbo ug nakuhaan sila og 50 gramos nga shabu.

Alas-10 sa gabii sa susamang adlaw gidakop silang Leo Olver Oliveros ug Eric Castro sa mao gihapong barangay  atol gihapon sa buy-bust operation ug nakuhaan ang duha og 105 ka gramo nga shabu.

Si Margate miingon nga human makalabay ang usa ka oras, nadakpan sa buy-bust operation didto sa South Bus Terminal ang usa ka Teresa Evangelista kinsa gikan pa sa Zamboanga ug nakuhaan og 650 ka gramo nga shabu.

Matud pa gikan sa Dapitan City sa Zamboanga Del Norte si Evangelista sakay sa bus paingon sa Dumaguete City ug gikan didto nilabang siya padung sa habagatang bahin sa Sugbo. Gituohang ibaligya unta kini dinhi atol sa Sinulog apan nasikop sa mga ahente. Apan gihimakak kini ni Evangelista.

“Bisag kausa wa gyud ko nakabaligya og shabu. Dili to akoa ang bag (bag nga dunay shabu),” si Evangelista miingon.

Nianang adlaw gyud sa Sinulog (Domingo) nadakpan sa buy-bust ang usa ka Barry Ege didto sa dalan C. Padilla, Cebu City ug nakuhaa’g 25 ka gramong shabu.

Nadakpan usab anang mga orasa sa laing grupo sa PDEA-7 ang laing duha ka mga gituohang tigpahuyot og shabu nga gikan gihapon sa Zamboanga diha sa Barangay Banilad, Dakbayan sa Sugbo.

Ang duha giila ni Margate nga sila si Roger Jumadil ug Mahidi Hajaral ug nakuhaan sila og 200 ka gramong shabu.

Sumala pa sa maong direktor sa PDEA-7 nga base sa ilang imbestigasyon ang duha sakay og eroplano gikan sa Cagayan De Oro paingon  sa Sugbo.

Nangutana karon ang PDEA-7 kon nganong nakalusot man sa seguridad sa eroplano ang duha.

“They are trying to use the backdoor. Naghahanap sila ng bagong rota kasi usually ni-roro nila from Manila,” si Margate miingon.

Giingong usa sa mga hinungdan nganong Cebu gyud ang hagbongan sa mga dinagkong bulto sa shabu tungod kay daghan ang adunay kapasidad nga makapalit og shabu tungod sa pagkamalambuon sa Sugbo.

“Cebu city is one of the most highly urbanized provinces of the Philippines. They are also taking advantage sa Sinulog festivities,” si Margate midugang.

Sa pikas nga bahin, gipun-an og mga  gamit gikan sa kaulohan ang maong ahensya sama sa lima ka mga body cameras, usa ka drone, walo ka mga radio, bulletproof vest ug uban pang mga ekipo alang sa anti-drug operation ang nangabot gikan sa kaulohan sa PDEA.

Matud niya magamit usab nila kini pagsigurong way sakop nila nga magbinuang sa operasyon.

“Napakalaking tulong (nito) kasi yun nga may mga reports na may nawawala (pasangil nga gikawatan sa mga ahente ang suspek). At least with this mapapatunayan talaga kung meron o wala. And again we are very strong sa aming conviction na we will really not tolerate itong katiwalian sa amin,” si Margate midugang.

Kahinumduman nga adunay 20 ka mga ahente sa maong ahensya nga gireklamo didto sa Ombudsman ug gipasanginlang nagpakaaron ingnong nagronda sa ilegal nga drugas apan nangawat og mga butang sa target sa giingong buy-bust operation diin mobalor na og P7.7 milyones.

“Nakakasira kasi sa momentum natin sa anti-illegal drugs operation kasi imbes na yung kalaban yung iniisip natin, yung mga kaso ang iniisip ng mga ahente. Babagsak talaga ‘yung operation natin,” si Margate miingon.

Aduna say tulo ka mga motor ang naabot aron mapun-an ang sakyan sa mga ahente atol sa operasyon.

Sa laing bahin, nagnegatibo ang gihimong surprise drug test sa mga ahente sa PDEA-7 dili pa lang dugay matud pang Margate. (IBM) (BANAT NEWS)