49 pamilya sa Talisay gihatagan og traysikad

CEBU, Philippines — Niabot sa 49 ka traysikad ang gipangapod-apod ngadto sa mga pamilyang giila nga kabus sa Siyudad sa Talisay niadtong niaging semana.

Ang mga pamilyang nakadawat niini nagagikan sa Barangay Cansojong ug Tangke.

Programa kini sa City Social Welfare and Development (CSWD) ubos sa Sustainable Livelihood Program diin nigasto og P490 mil.

Gawas sa traysikad aduna say pakapin nga uniporme ug payong ang nahatag sa 38 ka pamilya sa Barangay Tangke ug 11 sa Cansojong.

Ang pamilyang nakadawat mao kadtong naapil sa lista sa Pantawid Pamilyang Pilipino Program (4Ps) sa nasudnong pangagamhanan.

Apan ang maong programa gisaway gumikan kay magdugang lang kini sa katrapik sa Dakbayan sa Talisay.

Sa iyang bahin, si Mayor Eduardo Gullas niingon nga sa wala pa kini nila gihatag ang mga traysikad ilang gipahimangnoan ang mga nakadawat nga dili mobiyahe sa nasudnong karsada ug igo lang sila sa sudlonon nga lugar.

Si Felipa Solana, pangulo sa CSWD, nibutyag nga adunay color coding ang mga traysikad nga mahimo lang makabiyahe sa ilang barangay.

Aduna pa unya’y dos mil ka pamilya nga benepisyaryo sa 4Ps nga programa apan ilang gihuna-huna nga lahi na sab nga livelihood program ang ilang ihatag. (BANAT NEWS)